我怎可能是女神👸🏻獵人🏹（第一季更新至斷更為止）: 366

唉，QQ就喺度吹蕭，我就迫於無奈自己一條友喺學校自修室做功課，呢啲非考試季節又點會有人陪我吖…會溫書啲女都可能出晒去練啦啦隊。
孔乙己，最衰都係你，抵你俾人打跛腳，諗住溫完默書實無死，點知無做課後練習。
鄧：「喂！死人爽。」親愛的老師。
我：「嘩，嚇死人咩，做乜咁叫我…」
鄧：「有乜所謂，呢度又無其他人。」
我：「係啫，但妳係我先生嚟㗎嘛…」
鄧：「孔乙己課書就係叫你唔好食古不化，做人要多變通，懂得處世，亦都要關心其他人，唔好冷漠，你唔好扮嘢啦，平時有幾尊重老師吖。」
我：「係咁嘅話…做乜係都要留我喺度做埋份功課喎，我而家都欠少咗功課啦，我返去真係會做。」
鄧：「講起就啱，你知唔知我點解要留你喺度做？」佢執起我本課後簿嚟睇。
我：「因為…我讕醒…上堂喺度玩嘢…所以要罰？」




鄧：「梗係唔係啦，鬼得閒罰你，你呢啲罰都唔驚㗎啦，又唔會有效果嘅。」
我：「妳唔係嬲我用孔乙己嚟講笑咩？」
鄧：「唔係，如果係講同課書有關嘅嘢，我唔介意你哋上堂開心啲，唔好太過份就得，你識用孔乙己嚟開玩笑即係證明你起碼有睇過下課書，總好過望住我擘大個口得個窿。」
我：「咁…點解重要我留堂喎。」
鄧：「因為，你啲功課太有Queenie嘅影子。」
我：「唔係呀…我無抄佢㗎，雖然係有睇佢點答…」
我即時為自己辯護，因為QQ嚟咗之後我都無乜直抄佢啲功課，而且QQ本身都會鬧鬼我。
鄧：「我唔係話你抄Queenie啲功課，你都唔會咁蠢，明知我知道你兩個住埋一齊重將佢啲字搬字過紙咩，要抄都抄第二個啦，係咪？」
我：「咁…我到底衰乜？」
鄧：「我知道你啲功課水平好咗，而且我問過其他科嘅先生都話你有改善，但係，我相信呢個係Queenie嘅影響，如果我放你返屋企先做，你一定又會問Queenie，所以我想睇下你自己一條友會做成點…」




我：「哦…原來係咁。」太好，原來唔係罰我。
鄧：「喂！點解條條問題都兩行起三行止㗎。」
我：「我都係想快啲做完份功課啫。」
鄧：「你認為咁樣可唔可以攞到一個好嘅分數？」
我：「咁而家交功課啫，兩三行又交到功課，五六行都係交功課，課後又唔使改正嘅…到考試嗰陣我會寫多啲字㗎喇。」
鄧：「你估下平時寫得兩三行，考試先嚟落力，係咪真係可以變通到答晒啲重點即刻變高分？」
我：「總好過平時一啲嘅…」
鄧：「係囉，如果一個男仔從來無同女仔相處過，到有機會有個心儀對像出現喺佢身邊，你認為有無可能追到個女仔？」我即時諗起阿健…
我：「Miss…邊有先生咁樣問學生㗎。」
鄧：「其他同學就唔會，對住你梗係要糟騭下。」




係囉，係我錯，鬼叫我同佢玩種草遊戲。
我：「可以話唔使指擬，除非佢好靚仔，又或者好有家底，啲女仔乜都唔理就自己送上門，否則，都係九成食檸檬，甚至係食閉門羹。」
鄧：「咁，如果想溝女，平時要點裝備自己？」