我怎可能是女神👸🏻獵人🏹（第一季更新至斷更為止）: 367

我：「妳…真係expect我認真答妳？」
鄧：「答囉，得我喺度咋嘛，我又唔係唔知你乜嘢情況。」如果佢知我種草我咪要教埋佢點買燈？
我於是深深咁吸咗一口大氣。
我：「溝女呢，首先平時就要結識多啲女仔，同唔同嘅女仔都溝通下，唔好太過揀飲擇食，好嘅醜嘅都可以交流下，無人可以一步登天溝到女神，所以累積經驗係非常之重要，做人就要大膽，最好厚面皮，唔可以怕失敗食檸檬就縮沙，唔好怕瘀怕尷尬，就算尷尬都要自己哽咗佢，唔好尷尬落個女仔度，心態要主動，行動要大方，唔好窸窸窣窣（思思縮縮），只要未過女仔條底線都可以勇敢咁測試一下，直到俾佢毒打一餐為止，過程要瞭解個女仔，知道佢點諗，知道佢鍾意食乜，知道佢想收乜禮物，知道佢幾時需要你，重有嗰啲風趣幽默，經濟能力，個人衛生…一大堆全部知易行難，要再講落去就講成日都講唔完，大致上就係咁多啦，sorry for 1999。」
滴汗，四條黑線，都可以形容Miss而家嘅面容。
我：「做乜咁望住我呀…係妳要我答㗎咋。」
鄧：「你個死人頭真係點錯晒技能點數。」
我：「技能點數？乜嘢喎，我識吹㗎咋，唔識做，我無溝女好耐㗎喇。」應該係，除非唔係。
鄧：「真係無？」佢好似用懷疑我種草嘅眼神望住我，都唔知佢係真覺得我曳定同我玩…
我：「無喇，屋企有個女仔喺度重可以點溝。」




鄧：「你對佢其實係點㗎？」
我：「我對佢幾好呀，佢都無投訴，相安無事。」
鄧：「唔係啊，我係想問你個心係點諗。」
我：「佢又有仔，可以點喎，一齊住啫。」
鄧：「咁如果第時佢分手呢？」
我：「第日先算啦，都唔知佢會唔會show我。」
鄧：「嘻嘻，睇嚟你都係逃唔出女神嘅魔掌。」
Miss Tang個樣鬼死咁八掛，都唔知搞乜，唔係教緊書嘅時候佢同個學生都無乜分別。
我：「咁…有個靚女喺屋企日日對住，妳都明嘅。」
鄧：「明呀，我重明你用咁嘅態度做課後練習佢一定會睇你唔起，覺得你又懶又求祈。」




我：「得得得！我知錯，即刻加多幾行呀下…不過，就算我點努力，佢同我都係兩個世界嘅人。」
鄧：「知唔知乜係不為也同不能也？」
我：「知道，係中文字嚟…」
鄧：「不能也係你無可能做到嘅事，不為也就係你可以做到但唔去做，你明知溝女係一個咁艱深複雜嘅過程，呢少少課後練習又點可以懈怠呢？」
我：「知喇知喇，又無話一定要溝佢，不過我都會用心做功課嘅，唔使下下提住佢。」
鄧：「我知叫唔郁你，唯有用啲你在意嘅嘢啦。」