我怎可能是女神👸🏻獵人🏹（第一季更新至斷更為止）: 371

我：「但係呢度都無草地，我可以掉去邊？」
雖然我無乜品格可言，但都知掉落硬地就算唔整爛塊地都會嚇親人，先生見到實會殺咗我。
瘟：「你放低個波先，我哋夾手夾腳拖張厚墊出去咪有位畀你掟囉。」
厚墊就係平時上堂四人搬一張嗰啲深藍色大床褥，當然難唔到我同佢兩個啦。
Q：「畀我做乜！放喺地下啦！低B…」
我好肯定佢唔係飾演緊一個港女女神，而係佢本身就喺咁，嚟到我屋企就會入咗結界，真女神之力被封印，變成一個傻下傻下癲癲地嘅妹妹仔。
我：「係咪咁樣揸，放喺膊頭，推出去就得？」
瘟：「係，雖然我都無正式玩過，但睇人哋掟就係咁嘅姿勢，我諗學校唔會捉得咁嚴嘅，到時DQ咪問裁判錯乜，好似係掟三次…喂喂喂！等我行開先好掉呀！」
其實我唔係掉，只係想試推手用個力同埋關節活動位，不過佢個樣就好驚，可能以為我懷恨在心佢迫我玩陸運會要報仇；個鉛球就，一般咁重啦，同我屋企老竇對啞鈴差唔多，如果有草地嘅話我用推啞鈴嚟練都得。
瘟：「喂…你使唔使行咁遠呀，四米都有喇喎…」




我：「好難就力㗎喎…應該一推就有返啲距離。」
瘟：「唔理你，總之跌落張墊度就得。」
於是我札好個馬，lock實條腰，用力一推，粒鐵波仔就跌咗落張墊度，準確無誤。又唔係太難喎，不過稱唔上好玩…你問我點解咁易上手？因為都有打下籃球囉，同埋就掉紙波入垃圾桶，重有…以前會喺條街執啲磚嚟掟，同其他小朋友鬥遠，或者上後山配水庫掉落氹水度…聽完千祈唔好學呀。
掟完一次後，我執返個波又再掟多次，今次再行遠多半米，用多少少力一推又命中目標，我諗都試得差唔多，估計我呢個姿勢應該無錯。
我：「想問下要幾遠先有金牌㗎？」
瘟：「無記錯嘅話，男乙有十米八米已經好勁，乜你…諗住攞牌㗎？估唔到喎…明明誓願唔想玩。」
我：「唔係，無諗住攞牌，只不過男仔太短嘅話，好樣衰㗎嘛。」我叉住條腰同瘟神講，雖然佢係中四又係運動健將，但矮我幾cm係不爭嘅事實。
瘟神個樣大概滴緊冷汗，而QQ就不屑咁望住我。
無錯，喺學校入面嘅女神，笑你牙簽仔唔使攞許可證重會俾人話佢哋風趣幽默，但如果你喺佢哋面前講衰嘢就會俾所有人批鬥做變態鹹濕佬。