我怎可能是女神👸🏻獵人🏹（第一季更新至斷更為止）: 373

記住睇埋上一章update

瘟：「係，但有機會揩到，如果唔冧就有可能會成個人連埋個欄炒埋一碟，好易整傷。」
我：「咁我明喇，總之我嗰邊跑過嚟就係啦。」
對於馬路圍欄都跳到上去嘅我，呢個高度當然小菜一碟，無驚無險就過咗對面。
我：「睇嚟都唔係咁難啫。」
瘟：「落到場要連續跳十個，希望你到時OK啦。」
我：「咁又係，我再試多兩三下先。」
瘟：「我返去做嘢先，你玩完收返個欄入去就得。」佢講完就埋位繼續睇師妹啦啦隊排練，而QQ亦都跟咗佢走，正一女大不中留…
再玩多幾下，感覺上無乜大分別，剩返落嚟就係速度問題，短跑好講爆炸力，唔算係我強項，不過我又唔係要贏，唔仆街咪得囉，咁認真都唔知做乜；呀，唔記得講，我係著住校服跳，換埋PE衫同波鞋效果會更加好。




你質疑我？我話你聽，著校服皮鞋踢波都得，有乜唔得，街童係咁生存㗎啦，唔好咁高要求。
玩完就執埋啲手尾，然後去搵返呀社長大人。
我：「瘟…Vincent，我收返好啲嘢喇…」
瘟：「喂！妳哋搞乜呀，啲節奏又唔齊，動作又做錯，手腳又伸唔直，一啲火都無嘅，教練…咦！文書同康樂姐姐去咗邊呀？！」
佢好似當我無到咁…都正常嘅，呢度打緊仗，喇叭又播緊音樂，班低form妹又跳到七零八落咁。
「佢兩個…出咗去行街喎，好似話買化妝品。」有個類似都係幹事嘅男仔回答佢。
瘟：「有無搞錯呀！明知星期五操練最齊人最緊要，嗰兩隻嘢做乜走咗去？離晒大譜！」
「佢兩個中五嚟，你控制唔到佢哋㗎喇…」
原來社長唔係大晒，form幾都重有權力分野。
瘟：「嘉琪，妳可唔可以幫我帶住啲師妹先？」




琪：「頂你，見係同你同班先勉為其難幫下你，我兩年無玩過自己都唔熟，你諗掂佢啦。」呢個叫嘉琪嘅師姐一路食合味道一路答佢，睇嚟佢都係受害者嚟，完全唔想理社長啲無理嘅要求。
瘟：「點搞呀…唔係要我自己出去示範呀嘛，雖然都唔係唔得…」睇住佢頭痛其實幾過癮，所以我對呢啲活動同校務崗位都無乜興趣，完全係搵自己嚟煩，又唔保證可以溝到女嘅。
Q：「唉…見你咁慘，幫下你嘞。」
瘟：「得唔得㗎？妳都無練過…」
Q：「睇下點，你哋套動作年年都差唔多㗎啦，應該話根本就唔需要改，又無人睇你哋套動作有無新意嘅，除非你搵到幾個妹識打連續空翻啦。」
瘟：「我都想呀…不過，妳著住校服得唔得㗎？」
Q：「得，我會就住。」佢講完就喺枱面執起兩個啦啦球。