我怎可能是女神👸🏻獵人🏹（第一季更新至斷更為止）: 387

健：『無呀，都係講咗幾句，又係嗰啲唔熟嘅同學，乜嘢朋友都未係，無端端表白，又成日send message畀佢，搞到佢好煩，唔明男仔點解咁低B，唔知佢哋諗乜。』嘩，QQ呢下高招，暗渡陳倉，指桑罵槐，指鹿為馬，隔山打牛，借力打力！
唔係喎…打沉埋我添，今次唔止阿健嚇窒咗，我當然都唔敢輕舉妄動表達愛意…要知道我喺佢眼中可能都只係一個仆街仔，讚佢正，意淫下佢，親近下都好符合我嘅形象，一但認真起上嚟隨時天崩地裂。
我：『周不時都有呢啲㗎啦。』
我差啲講埋隔籬位女神都大把，避口不提好啲。
健：『但係我瞓唔著。』
我：『我無嘢幫到你喎。』外加一個無奈emoji。
健：『佢同我講呢啲係好事定壞事？』
其實無論點對佢嚟講都只會係壞事。
我：『聽日先講啦，呀，如果你想要專業意見同輔導嘅話，我唔介意聽日餐晏晝交畀你埋單。』
健：『屌，講呢啲…聽日見啦。』加個鄙視emoji。




唔得喇，諗起就覺得煩，我要仆落床瞓覺喇，早抖QQ，早抖吉百利。
到咗第二日，我起身嘅時候QQ已經出咗門口去拍拖；唓，好叻咩，我夠有得同人撐枱腳，重有人請我食晏，只不過佢係男仔嚟咋嘛…就係咁，我同阿健約咗喺屋邨快餐店度食晏，我成功謴咗佢一碟黑椒牛柳絲炒意，算係比碟頭飯貴幾蚊。
健：「喂，飯就請咗你食嘞，咁你有乜高見呀？」
正所謂受人米飯，替人消災，一飯之恩，當面即清。
我：「依我所見，無論佢同你講乜都係好事嚟。」
正所謂風水佬呃人十年八載，我都起碼要呃返佢十個月啦，最緊要答得夠玄，重要唔好打沉佢，等佢心懷希望，咁做人先有意義㗎嘛。
健：「咁點解係好事嚟？」
我：「起碼佢有嘢肯同你講吖，內容唔重要㗎，就算佢話唔鍾意你都係一件好事嚟。」
健：「吓，咁都係好事？」
我：「咁起碼你知道先吖，知道就有機會化解，有機會變，總好過對你不聞不問，不瞅不睬，而且同得你講唔鍾意你，即係起碼佢唔係呃緊你同玩緊你。」




其實我都好想知QQ鍾唔鍾意我，我唔係怕佢唔鍾意我，因為從來我就無奢求過，純粹得個知字；但我又唔可以要佢親口講出嚟，因為咁樣一定會破壞到我哋而家融洽嘅相處；以QQ現況嚟睇，我係無可能估到佢真正嘅心意，佢實在太古靈精怪，但我諗佢知道我鍾意佢嘅，不過學Carmen話鍾意有咁多種，全世界男人都鍾意靚女㗎啦，佢知道可以話無特別；唔知佢鍾意我呢個機會有幾渺茫呢？其實都係得個知字，我又唔會要佢即刻分手做我女朋友嘅，有啲嘢都係心意最重要，知道佢咁諗已經夠我滿足死。
健：「咁，你覺得我重可以做啲乜？」
你個傻仔除咗識送skin重識做啲乜？