我怎可能是女神👸🏻獵人🏹（第一季更新至斷更為止）: 403

Q：「喂，唔係你失身張床，係細蚊失身張床…而家俾我霸住咗嚟瞓。」
我：「妳咁講…最早喺上面瞓嘅女仔係Carmen。」
Q：「乜唔係你媽咪咩？」
我：「咦，妳咁講又係喎，sorry…」
Q：「我重記得上次細蚊瓹返入去個樣不知幾開心，女仔應該都會掛住第一次張床。」
我：「呢個…我就唔知佢喇，我同佢無嘢…」
Q：「唔知重會唔會有女仔喺呢張床上面失身呢？」
我：「哈哈，而家啲女仔好快畀人食晒，無咁多…供應。」
Q：「咁無自信？話唔定你就係負責食嗰個。」
我：「咁我就唔知…無諗過呢樣嘢。」




Q：「有時我會覺得自己失咗身所以安全啲，如果我重係處女嘅話，某隻色狼一定會對我虎視眈眈，然後又買枝somersby嚟畀我飲。」
我：「乜妳咁睇我㗎…」
Q：「只不過你識咗細蚊先啫，如果我早一年嚟借住嘅話，睇怕就凶多吉少。」
我：「早一年…我婆婆重喺度住…之後Carmen又成日上嚟，應該無機會畀妳暫住。」
Q：「信你至奇呀，肯定諗緊點樣可以畀我住又繼續同Carmen姐姐玩。」
我：「又或者要諗下邊邊好玩啲…」
Q：「重要諗，為咗我同Carmen分手唔係好應該咩？你唔係講到我好正嘅咩？」
我：「咁…Carmen都唔差，佢重對我好好添…點會無端端為咗個麻煩嘅同班女神同人分手。」
Q：「例如用我嘅初夜嚟換你趕走Carmen。」
我：「吓…吓…點解…會係咁。」




Q：「為咗有屋住，有飽飯食嘅女人就係咁。」
我：「我唔知…乜都唔知…」
我俾QQ迫咗入死角，雖然我唔太知佢呢段對話係乜嘢意思，但我實在係唔識答佢，當時嘅我…已經同Carmen玩過好多次，佢又堅持唔同我攪嘢；Queenie又真係好吸引，重要係初夜，當時嘅我應該會忍唔住好歹都食咗先…但之後點搞好，我真係好PK，可唔可以叫Carmen姐姐幫我諗辦法，但可能會死得更加慘。
「咕嚕嚕咕嚕…」從我嘅掌心傳嚟聲音。
我：「妳聽唔聽到有聲呀？」
Q：「係呀…你嘅右女神做完運動，肚仔餓喇…」
呢個時候個天啱啱黑，睇嚟都係時候嘞。
我：「好啦，咁等我返去整嘢食喂飽妳啦。」
Q：「屋企有乜食呀？」
我：「雪櫃有乜咪食乜，都係咁上下。」




Q：「不如出街食咯。」
我：「出去食…咁樣…」
Q：「平平地就得㗎喇，你唔使擔心。」
我：「唔係呀，只係諗緊妳唔係好驚俾人撞到咩。」
Q：「同你住咗咁耐，好似都無乜試過出街食，lunch又未同你食過，諗落好對你唔住啫。」
我：「有乜所謂喎，喺屋企同妳一齊食咪一樣咁開心，我又唔介意煮埋畀妳嘅。」
Q：「有無地方，係無咁易俾人撞到？」