呢個時候我伸個頭出去望落樓下…嗯,都幾高下,放心我唔係要做傻事,只係想觀察下邊度少人啲,喺頂樓望晒成個區都幾方便。
我:「嗯…呢度街市後面有間罨耷粉麪檔,街市差唔多收,間鋪收七點幾,入面坐得幾藞苴下,應該唔會有一家大細去食,呢度後面條路通到過去,我諗算係最安全。」
M記,大家樂,商場快餐店呢啲我諗都唔敢諗,上次先撞完細蚊嚟,班波友都會成日去,亦都無理由去我一陣返工嘅酒樓,況且都唔會安全得去邊,呢個鐘數大把同學成家去食晚飯。
Q:「咁啲嘢食好唔好味㗎?」
我:「我食過兩三次咋,覺得都幾好,同埋平囉,三十幾蚊就有碗麪同嘢飲,凍飲唔使加錢添。」
Q:「好啦!咁我哋而家就去食。」
而家又未至於即刻嘅,我哋由頂樓跑返落屋企先,佢笠返件長袖T,我就換返條長褲先出門口;女人睇嚟真係唔怕凍嘅,長袖衫係要露少少腰出嚟先安樂,實在夠晒本末倒置,至於條yoga pant,我唔理喇,佢鍾意曬自己條美腿同個pat出嚟畀人睇我都無佢符;雖然呢條路無乜人,但我哋都係無拖手,點都好過平時前後腳嘅。
Q:「牛腩米,凍奶茶走甜。」
我:「牛雜河…都係凍奶茶走甜。」
Q:「哈,我飲乜你飲乜,抄我嘅。」


我:「以為妳一定飲zero,所以成個腦都係zero,一時之間諗唔到重有乜其他嘢飲。」
Q:「即係你原本都係要學我啦,屋企成大枝zero喺度,出到嚟梗係飲其他,汽水好平㗎咋。」
我:「你飲乜都唔加糖嘅?有無咁驚肥呀,啱啱先做完運動咋喎。」
Q:「NoNoNo,肥唔係重點,問題係糖好傷身㗎,尤其係對皮膚同頭髮唔好,影響我顏值點算呢。」
我:「哦,但係妳重會食朱古力同曲奇…重有雪糕。」
Q:「唔準質疑我呀!我註明咗係72%杏仁朱古力,少咗糖喇,曲奇係你買返嚟陷害我嘅!最衰都係你,好奸狡呀!」乜都妳講晒啦,賴茜旎…
我:「但係,妳同班姐妹去食乜嘢afternoon tea,啲cake,啲macaron,啲甜品全部都好甜…」
Q:「鬼唔知咩,所以我唔太想食㗎咋,但同佢哋一齊無辦法啦,唔通自己一個唔食咩,所以平時飲嘢就更加唔可以落糖嘞!」
女神,顧名思義,神又係妳,鬼又係妳,唔係鬼妹嗰種鬼,係女魔頭嗰種。
已有 0 人追稿