我怎可能是女神👸🏻獵人🏹（第一季更新至斷更為止）: 423

吓？！有啲咁嘅事？諗落又係，有啲方啲，有啲圓啲，我發覺圓嘅點醬無咁方便，但竟然有四種！
我：「我…英文好水咋喎，用中文得唔得？」
Q：「梗係唔得啦！麥當勞係西餐嚟㗎嘛，所以一定要用英文答，畀多個提示你，四個都係B字頭。」我望住佢一面無奈，實在無能為力。
原來M記係西餐嚟…下次如果妳話想食西餐我就帶妳去同麥叔叔撐枱腳…
Q：「B字頭，有一樣嘢你好鍾意嘅呢…」
我：「呢個…B…Ball shape！」
Q：「啱！但重有三個。」
點算好呢，重要啲麥樂雞已經俾我哋清晒，搞到我想望住嚟諗都唔得…咁，唯有撞下啦。
我，Q：「Bomb！…炸彈咪即係Ball…Biscuit！…邊有咁薄嘅麥樂雞呀…Banana！…你睇得太多Minions喇…Bus！…你摷幼稚園英文書…Boat！…唔啱…Bowl！…何來半圓形…Baby！…你講到雞仔咁好恐怖…Bulb！…我都知你鍾意electric嗰課…Bucket！…都唔啱…」
差唔多，所有我識B字頭嘅物件都俾我講晒，除咗我知道Bra shape一定唔啱而無講。




Bag？Bat？Bed？Bad？算，應該無咁低B…
我：「投降喇，真係諗唔到。」
Q：「另外三種係Bell，鐘形；Boot，靴形；Bone，骨頭形。」屌，都係三隻我識嘅字，點解諗唔到…
我：「Bell同Bucket咪差唔多，Bone邊有咁幼呀？」雖然我大致match到，但都唔係幾同意。
Q：「唔關我事，唔啱就唔啱，全世界都係咁叫。」
我：「吓，我第一次聽到有人會幫麥樂雞分類。」
Q：「是但啦，總之你無奬，呵呵。」
唔緊要，我會記住呢個奬品，遲啲喺其他項目度贏返嚟。
Q：「唉，咁食法真係好熱氣，好驚出粒粒…」
妳都有仔啦，都唔知有乜好驚，如果妳生幾粒暗瘡就叫大件事，咁睇怕好多女仔可以投河自盡砍掉重來…不過，我都驚熱氣嘅，十六隻唔講得笑。




我：「一陣我沖菊花茶一齊飲啦，夜啲就煮菜食已經夠。」
Q：「唔夠，重要多包蝦餃。」
我：「知喇，呢個都已經係規矩嚟。」
一個月，我哋平均消耗十五包蝦餃，每包介乎十一蚊到十二蚊，總消費大概係170蚊左右。
Q：「重要諗下聽朝食乜早餐呀，又要早啲起身。」
我：「無所謂啦，食幾塊曲奇都得。」
如果大家記得，我屋企重有好多黑罐存貨。