我怎可能是女神👸🏻獵人🏹（第一季更新至斷更為止）: 424

Q：「咁點得呀，你聽朝早就有個三千米項目喇，食好少少啦，補充啲蛋白質，煎或者烚兩隻蛋啦，加多條腸，重有飲牛奶。」
我：「有乜所謂喎，純參與啫，又唔係為咗贏，平時餓住個肚我都係咁跑㗎啦。」
Q：「我都係為你好啫，唔想你跑得咁辛苦。」
好感動…原來女神咁為我設想。
我：「知道，我會聽話㗎喇，咁妳有無要求呀？」
Q：「一樣都得啦，我下晝先跑四百米初賽，最緊要lunch唔好食太飽啫，朝早就食多啲都得。」
我：「我再煮個公仔麪畀妳囉。」
Q：「同埋今晚要早啲瞓，我哋臨瞓前拉拉筋吖。」
忙碌嘅女神夠晒準備充足，俾著係我嘅話好可能瞓到最後一分鐘先起身，嘢都趕唔切整嚟食求祈袋幾塊餅乾上巴士咬就算。
Q：「唔係喎，我唔可以同你搭同一班巴士去㗎喎，應該話…我唔可以俾熟人撞到我搭呢條巴士線，睇怕要早半個鐘出門口至得，咁…不如我早啲去到運動場附近食啦，無謂要你就我。」




我：「唔緊要啦，係呢兩日早少少起身啫，又或者…我哋一齊搭的士過去？我諗都係六七十蚊。」
Q：「無謂嘥錢啦…唔係喎！梗係唔得啦，我哋又唔熟嗰邊地理位置，容乜易俾人見到我同你一齊落的士，到時就真係水洗都唔清，重衰過喺巴士上面撞到人。」
QQ真係心思縝密呀下，妳點話點好啦。
嚟緊幾日都唔使上堂，我就梗係唔會即刻做功課啦，於是就攤咗喺床上面玩無聊app game，而QQ就坐喺梳化對住部電話打打打，估計一係執緊佢個IG，一係就同男朋友或者佢啲姐妹chat緊，亦可能打緊文。
雖然我哋生活得好緊密，但平時除咗食飯做功課之外都好少會坐埋一齊，無端端迫埋去應該會俾佢揼死；我諗佢唔想…而我亦都唔想睇到佢同條仔啲對話嘅，雖則夜晚啲情慾電話我都聽到慣晒。
好神奇，大家都好似無咗件事咁，除咗佢啲輕聲細語嘅呻吟聲會時不時縈繞喺我個腦度。
間唔中佢會發現我望住佢而望返過嚟，對望完兩秒之後，通常佢就會E起棚牙傻笑，又或者伸條脷出嚟扮鬼臉…你問我尷唔尷尬？初時都幾㗎，我而家只會想猛虎擒羊撲過去非禮佢，想囉。
過咗一陣我就收到社長大人嘅message，係一個壓縮檔，標題係請慢用；我打開嚟一睇，真係好鬼清，連啲色都已經執埋重靚過頭先相機mon睇，唔怪之得佢可以一直肆無忌憚咁喺學校影相。
順帶一提社長嘅頭像係著住運動衫攞牌嘅相，唔知係學校陸運會定出面啲比賽嘞，fine，我對呢啲現充生活是沒有興趣的！