我怎可能是女神👸🏻獵人🏹（第一季更新至斷更為止）: 425

望住幅相，靚就係靚，但對於我嚟講可以話係毫無意義，頭先我都係志在戲弄一下社長而已。
於是乎我行咗去梳化前面，踎低咗喺度，十足十隻青蛙咁望住QQ，而佢就帶住疑惑同埋鄙視嘅目光嚟望住我；彷彿我已經變咗一隻令人厭惡嘅爬蟲類，有一塊光滑嘅皮包住，濕納納又黏黐黐，摸起上嚟有啲彈性又軟軟地嘅質感。
Q：「我feel到你過嚟好似想做啲變態嘢咁喎…」
佢嘅眼神開始由懷疑變成目露兇光。
我：「邊係呢，放心，我唔會非禮妳嘅。」
即係咁，一般嚟講呢，踎喺個女仔前面貼到咁埋望住佢已經可以算係非禮；但因為我哋一齊住咗咁耐條標準線當然係會拉高少少，起碼都要用手零距離咁接觸佢啲敏感部位先叫非禮；我話嘅，大家千祈唔好有樣好樣，如果唔係變咗搞笑漫畫日和入面隻熊吉你就唔好賴我。
Q：「我唔係驚你非禮，你好似想做啲更變態嘅嘢咁喎。」佢嘅表情同口吻開始同兔美子同步。
我：「妳多心喇，一齊住咗咁耐，幾時有做過啲令妳唔舒服嘅嘢呢？」
Q：「有無聽過凡事總有第一次，如果你夠膽亂嚟嘅話我就一腳䟫到你轆落地。」
本來QQ係晾起咗兩隻腳上張凳度，而家佢抽起咗隻右腳拉弓凌空對住我塊面，而我就望住佢隻腳板底。




我：「欸…呢個服務都好似幾過癮咁喎。」
Q：「你重話唔係走過嚟要對我做啲變態嘢？」
我：「冷靜啲先，女仔人家點可以郁手郁腳嘅呢，妳放心…唔好郁就得。」
然後我就伸手將佢個衫腳向上拉高咗兩吋，將佢個肚臍仔暴露喺空氣之中。
Q：「你個…仆街，唔係想咁樣兜個圈嚟話我肥呀？」其實係一啲都唔肥，只係小小肉。
我：「點會喎，我對下粒肚臍個樣咋嘛。」
我將電話入面幅相放大咗，令到個肚臍同真實嗰粒係一比一size，再放喺隔籬做對照，果然係連啲紋都一模一樣樣，而QQ呢個時候亦都發現咗我呢個惡趣味。
Q：「借問聲…呢幅係乜嘢相嚟！？」
我：「呢幅呢，係一個絕世大美人，女神…」
我都未講完佢就已經喺我手上強搶咗部電話。




妳做初一，我做十五，就等我強搶民女…講下啫。
我：「暴力女魔頭嘅肚臍相。」
Q：「妖！點解你會有幅咁嘅相㗎！」
同一時間我俾佢用腳板底䟫落心口上面坐咗喺地下，不過呢，我自己係識起返身嘅。
我：「我作為妳嘅首席fans，點可以無妳嘅閃卡呢？」其實我都唔知自己算唔算係佢fans。
Q：「係德爺佢啱啱影嗰啲相？」
我：「唔知呢…唔好問我…我無辜㗎。」
Q：「肯定係啦，清到咁，係佢啲大機先可以影到，喂，你同佢咁熟嘅咩，點解可以攞到佢啲相？」
我：「秘密，不過我其實同佢唔熟。」
Q：「個死嘢吖，又真係影得幾鬼靚喎。」




呢個女人，係都要讚下自己靚先安樂。