我:「係呢,你同細龜咁熟㗎?」
豬:「上年同班吖嘛,重一齊坐過三個月。」
我:「原來係咁。」
豬:「條粉腸有無蝦你呀?有就同我講,等我揼柒佢條契弟。」
龜:「無嘅,阿爽佢都幾好人。」
感動呀,一個成日唔出聲嘅同學竟然話我幾好人,睇嚟我聽佢吹乃木坂都算係做咗件善事。
我:「乜佢係你條靚嚟㗎?」
豬:「係呀,吹呀,你唔好見人細膽就蝦佢,我實過嚟收拾你。」
我:「哎呀,咪小學雞啦,重打來打去咩…唔叫你呀朱,可以點叫你呀?」
豬:「你叫我『你』咁咪得囉。」


我:「你唔好話『喂』,如果成堆人鬼知邊個係你喎,個個都係你。」我都唔知自己噏緊乜。
豬:「咁,你可以叫我做Kevin嘅。」
Kevin?咪Minions入面高高瘦瘦嗰隻?一啲都唔襯囉,叫Bob都好啲吖…佢講出嚟都尷尷尬尬咁,不過是但啦,都已經中三重嗌佢肥豬的確唔係太好,如果唔係同我撞名嘅話我會推薦佢叫做叉燒,好味得嚟都幾有型呀。
我:「呀凱文同學…做乜唔報多啲嚟玩啫,例如跳高跳遠呢啲,個畫面都幾震憾呀。」
豬:「嫌未玩夠呀?再講我就揼到你大髀唔使落場跑!等你好似孔乙己咁爬足三千米!」大家都係教完呢課書,竟然變咗我哋共通語言。
坐咗唔夠十分鐘就聽到三千米集合,於是我原地除咗條track褲,然後走過去搵埋阿健先。
B:「健仔畀心機跑呀!」終於聽到Bubble出聲,都幾cute呀,比佢個外表更女仔;唉,點解我社長係師兄嚟㗎,又唔派文書財政同我打氣,啲女人喺度得個擺都唔知有乜卵用。
我:「睇嚟你今次可以出盡飲奶之力嚟跑喇。」
健:「咪講笑啦,你估真係贏咗就有奶飲咩…就算係,都唔會攞到金牌,這些機會不是我的。」
我:「有個大波師姐同你打氣都好吖,盪下盪下咁,睇到都開心。」


健:「咁你呢,贏咗會有啲乜?」
我:「贏咗有牌?有無優點㗎?」
健:「唔係呢啲呀,女神叫你玩就玩,唔係有嘢打賭嘅咩,佢畀乜著數你?」
如果我話乜都無又好似好怪咁,唯有含糊帶過…
我:「如果攞到分,佢話請我食飯喎,但我都唔識計分嘅。」
健:「嗯,即係釣勝於魚,醉翁之意不在酒。」
我:「吓…你係想講啲乜呀?」
健:「重點唔係餐飯,而係同佢食飯囉。」
我:「同佢食飯有乜特別?已經日日都坐隔籬。」我當然扮到毫無期望,而事實上就日日都食㗎啦。
健:「吓,食飯係兩個人嘅事喎,而且你知唔知有無數咁多人約啲女神食飯都食檸檬,佢哋平時都係自己一堆圍埋食嘅,如果係我就嗌小菜兩份share,幻想下會食到佢小小口水尾。」


係呀…例如半隻瀨尿蝦。
我:「有咁誇張咩?聽聞瘟…Vincent,即係我個社長,前排先同佢放學食炸雞。」
健:「我知呀,連佢啲內閣都笑佢溝師妹,聽聞財政姐姐重講笑咁話心淡,但點同呢?人哋係社長大人,而你自己又係乜。」
已有 0 人追稿