我:「我咪係坐佢隔籬位囉。」
健:「隔籬位又點?有本事就溝佢返嚟囉,你咁叻,坐咗兩個幾月有無食過一次lunch吖?」
我:「呢層…無呀。」竟然唔使講大話。
有時我諗,QQ專登黐埋去社長度係咪想轉移視線,等啲人唔會諗我同佢係咪有嘢,而且就算佢同社長俾人講閒話都有啲郎才女貌嘅feel,唔會話好尷尬,不過其實佢又有男朋友…
報到完之後就喺等候區同健仔一齊拉筋熱身,都係嗰啲啦,無女嘅鏡頭你哋自己用生活經驗補完,未試過玩陸運會嘅就去試下啦。
我望一望乙組嘅參賽者,大約有十個人參加呢個唔受歡迎嘅項目,長跑呢啲其實好易睇邊個係高手,有個應該係中四師兄黑黑實實生到成隻豹咁,我買佢贏…唔好以為我喺度長他人志氣,滅自己威風;如果我糊裡糊塗咁嚟玩都可以攞到金牌咁唔貼地,我分分鐘已經食晒堆女神,重可能同Miss Tang上埋床添!講笑…咪打我。
輪到我哋組,乜都唔識嘅我就跟住先生埋位企喺條斜線前面,我到而家先知三千米係全世界一齊跑內圈,要爬頭先換線…接住喇叭一響!
一輪褪位搶奪之後,唔知點解我好自然就跟住喺阿健嘅後面,可能我想同個自己識嘅人一齊跑掛,多過去諗點樣爭奪名次,反正唔係最尾就得,開步我哋霸佔住六七嘅位置。
隻豹果然係喺前段頭三,但又無急於帶頭,反正佢哋明顯快過我哋一截;唔理喇,三千米係好悶嘅項目,可能因為咁就安排喺開幕後即刻進行,而我就當練跑算,幻想平時夜晚喺球場同QQ一齊跑。
經過我哋社看台嘅時候,我發現QQ有望住我,佢係咪同我打緊氣呢?當係啦!其實佢點解要推我嚟參賽?真係為咗嗰幾分?我唔知。


我只係知跑完就有得同佢惜惜,嘻嘻。
跑完四圈,隻豹已經如我所料帶咗出嚟領先十米八米,其他幾個人明顯跟唔到佢嘅速度,而隻豹前面不遠處,有另一個參賽者…
健:「你…喺度…」我換咗二線。
我:「唔等你喇。」
話晒都係比緊賽,全程練跑好似有啲對唔住自己,按道理我係一定跑得快過阿健;對唔住嘞,係你叫我陪你一齊跑㗎咋,Bubble怪你嘅話都唔好賴我。
呢個時候我應該第六,如果爬到三個人頭就會有牌,係咪?唔識計,總之我要跑快啲,前面條友同我差咗十米唔夠,跑呀跑呀跑,咦,真係過咗佢,第五…即係多一分?
已有 0 人追稿