我怎可能是女神👸🏻獵人🏹（第一季更新至斷更為止）: 440

唔理快我哋差唔多半圈隻動物…我繼續追住第四名，當我貼近嘅時候佢好似發現咗我嘅迫近而加速，我感覺到佢係有意識想甩開我嗰隻；死嘢吖，明明一直都唔係咁快，點解我一嚟到就加速，佢呢個舉動令我極之想超越佢，我唯一可以做嘅就係跟住佢嘅速度。
我貼住佢跑咗一圈，我知道而家格硬超前係完全無作為，就算我喺度跑到段極速一百米，但喺睇唔到佢嘅情況下，佢一定會搵機會喺尾段過返體力耗盡嘅我；咁嘅話，決勝就只會喺最後嘅百零二百米。
屌！明明話咗落嚟行幾過圈，點解要搏晒老命咁跑…但為咗QQ嘅話，跑啦，我愛妳。
呢個時候第二同第三相繼體力不繼…抵死啦，一開始就追住隻動物，烚下烚下攞嚟衰，我同前面位人兄用咗大約圈半嘅距離嚟超前兩個傻仔…即係話我而家第三？金牌就話攞唔到啫，銀牌係咪可以攞？銀牌都幾型吖！
去到最後一圈，條友竟然重keep到個速度，甚至接近人哋跑400嘅氣勢；我同自己講，佢係一個死街童，抽咗我條女嘅水，我要追住佢然後揼柒佢，運動場唔係我主場，落到街我睇你點死，衝呀！
我無慢過佢，而且一直迫近，去到隻手差唔多掂到佢背脊咁滯，入到最後大直路一百米！係時候喇！我由一線轉去二線再加速，實行當一百嚟跑！點知條友又褪咗嚟二線…
吓！佢有後眼㗎？就算係…乜可以咁樣迫死人唔俾爬頭㗎咩？屌…原來跑拉尾條友慢我哋一圈…咁點？我要去第三線爬頭？但再換線會拖慢我節奏，按道理佢係咪要褪返去一線？我唔知，我唯有斜少少咁繼續加速，呢個時候只係剩返十幾米…
我爆到盡追到接近平排…但只係接近，十幾米內我做到嘅嘢唔多，節奏又打亂咗，衝線嗰刻我知自己係第三。第一次，我好想贏，唔係話乜嘢要天下無敵；而係眼前明明有個對手，我應該可以贏到，點解…跑第尾條友要阻頭阻勢，如果唔係…但我知賴地硬係無用。QQ，可唔可以話我知，我係有機會贏到妳？
銅牌…飲恨啊…QQ妳會唔會為我而高興？
我望上去紅社看台，班拉拉隊企晒起身係度拍啲吹氣條條，呢個時候我先好似由異度空間返返嚟現實聽到佢哋啲打氣聲；做乜咁興奮嘅？乜原來攞到第三佢哋就會咁高興㗎嗱？我喺堆條條海入面搵到QQ，佢都興奮到跳下跳下咁…




咦…無理由吖…我係咪自戀得滯？突然醒起，望一望隻豹，原來佢都係紅社…Fine，OK，我收皮摺埋彈開；我喺一秒內就搞清楚個誤會收拾埋心情，是但啦，攞到牌都叫有交代。
再過咗五秒到…阿健都衝線。
健：「嘿呵…嘿呵…嘿呵…」
我：「喂喂喂，你無嘢吖嘛？」