我怎可能是女神👸🏻獵人🏹（第一季更新至斷更為止）: 452

返到運動場，Uranus再一次義正詞嚴咁叫肥豬搞掂壇嘢，然後就各散東西返去原本嘅位置；而肥豬都真係認真坐喺度諗下點分工，再send message畀唔同嘅同學，雖然有時覺得啲女仔係好煩，但大部份時間都係為咗件事好嘅。
而我就喺度專心消化啲食物，間唔中望下坐前排嘅QQ，雖則佢唔係啦啦隊，但都會同佢哋一齊起哄，跳下跳下嘈到拆天。
到咗兩點幾就係QQ嘅四百米初賽，佢好輕鬆咁喺啦啦隊區行落去就位，咁我都會發自內心同佢打氣同埋想知佢究竟會跑成點，一如所料有女子組賽跑德爺就會捕住喺度；四百米有樣好，就係起跑同終點都係同一個位置，好方便佢唔使走來走去影相。
初賽嘅速度參差非常大，最後佢攞咗個第二，不過就同第一有一段可觀嘅距離，如無意外就算入到聽日決賽都會好似佢嘅講法咁唔會攞到金牌。
再坐多陣就到我跨欄初賽，睇住啲helper一個一個欄咁戙高，今次孤軍作戰嘅我又落返去準備區熱身；明明係第一次參加呢個活動嘅我感覺到熱血沸騰，彷彿聽到身體嘅關節喺度吱吱聲咁叫。
嗯！目標就係銀牌啦，雖然聽日先係決賽。
首先係丙組初賽，原來丙組同乙組個欄係唔同高度嘅…不過唔關事，周街跳嘅我肉眼見到有幾高就會跳返相應嘅高度。
再一次落到跑道上踎低On my mark，我嘅鬥志正在燃燒，就好似我當日營救細蚊同條仆街戰鬥嘅狀態咁；雞聲一響，我拔腿就跑，係一個好好嘅速度，保證學校唔會有任何一個訓導可以捉到我，跨越第一個欄嘅時候係出奇地咁順暢，明顯地我就係呢項運動上面嘅天才！一落返地又繼續施力加速，幻想自己喺度逃避緊童黨嘅追殺，然後第二個、第三個、第四個欄都變到好似自然動作咁。
去到最後兩個欄，我feel到只有一個對手係同我平排再快少少，於是我再加強大髀嘅爆發性，今次一人一條賽道我唔使再擔心要點樣爬佢頭，喺最後嘅廿幾米我係當做一百米咁跑，如果可以第一名衝線嘅話一定好型，QQ睇到實會好開心！
咦…唔係喎，而家只係初賽嚟，得兩組選拔我呢個姿態實入決賽，為乜要而家搏到盡呢？一陣做成肌肉勞損就得不償失，所以喺最後一個欄前我又放返慢啲個步伐；咦…係時候跳喇喎。




點知就係呢個速度變奏，令我呢一下嘅起跳嘅距離遠咗少少；咁，我大力啲跳咪啱囉…嘿！結果我都唔識形容，高係好似高咗，但變咗落嚟嘅時候鞋底壓實咗個欄頂咁…個欄無應聲俾我踢冧，而係順住我嘅去勢戟住我咁一齊跌。
低B嘅我失去平衡，連埋個欄向前仆咗喺度…
我相信呢個係高難度動作嚟…屌…樣衰爆，但落咗地要識起返身，呢個比賽重未完；我雙手撐地連埋隻腳用力一彈咁跳返起身即刻繼續跑，發生呢個自然反應嘅總時間我諗連零點三秒都無。