大家可以幻想下睇荷里活動作片,個男主角面對住黑幫嘅追擊,俾架私家車迎面撞埋嚟,佢當機立斷跳起個人轆上架車上面,輾過車頭玻璃再喺車頂被甩出去,跌落地下轆多兩圈卸力之後就要即刻爬返起身閃人,如果唔係實畀架U turn返緊轉頭嘅車車死。
對唔住,我知道就算講再多都粉飾唔到自己戇㞗嘅表現…最後我夾硬奮力衝埋嗰十零米,名次好似第三定第四,不過唔重要,我已經痛到坐咗喺跑道側邊抱住自己隻腳。
其實…整傷事少,出醜事大;成間學校嘅人睇住自己仆街都咪話唔瘀,唔知頭先個旁述老師有無講我壞話呢?我都唔知,因為跑緊嘅時候個腦自然熄晒啲無謂嘅機能;唉…對唔住QQ,明明本來可以好地地完成賽事,一時失暈就搞成咁,妳一定好睇唔起我…
過咗十五秒唔使,就有個red cross姐姐攞住個急救箱走埋嚟,個樣唔太靚,有啲似死讀書咁嘅樣,我好掛住Carmen姐姐呀…唔可以咁,整損咗有人服侍已經好好,我唔可以太多要求。
佢好有技巧咁單膝跪喺度,兩隻腳拍埋一齊,確保我唔會睇到佢走光;係㗎喇,我就係咁曳,唔靚女都會睇下有無好嘢睇,呢個係強迫症嚟。
唉…又係嗰包檸檬汁,見到就想屌出聲。
不過呢個moment心理壓力大過生理需求,淋落嚟嗰刻我竟然覺得唔太痛,又或者無一個俾我扭計嘅女仔做對像,我已經懶得去痛。
瘟:「呀爽!無嘢吖嘛你?」
親愛嘅社長都有報男乙跨欄,話咁快第二組嘅初賽賽事已經完咗,佢衝完線就即刻過嚟慰問喺終點線側邊負傷嘅我。
希望佢真係想慰問而唔係心底笑㞗我啦。


我:「擦損下啫,無乜大礙,都係包一包就得。」
瘟:「咁就好,如果唔係實擔心死我…係呢,我頭先睇過你嘅成績,好似都重入到決賽…」
我:「呢層…聽日…」講真,話嚴重又唔係好嚴重,跑就實跑到,但我今晚都會結焦,即係要我拉爆個傷口繼續跑,如果要盡力爭勝嘅話…我都好想攞牌,好想喺QQ面前威,但搞成咁好似已經無必要勉強自己,又唔肯定個傷口會對自己表現有幾大影響,除咗肯定跑完會痛到想抱晒我識嘅女仔。
瘟:「欸…我唔係想迫你出賽呀,係覺得可惜啫。」
我:「都係玩下啫,我其實無乜所謂。」
講就咁講,口硬而已。本來都無乜嘢,但瘟神一嚟到我就醒起本來聽日可以同佢比賽,如果我攞到好成績,如果我贏埋瘟神,我就可以攞住塊牌同QQ講社長都唔算得係啲乜啫,然後一嘢惜落去佢個嘴仔同佢打茄輪,搞到佢潮熱汗出之後就讕深情咁望住佢,同佢講返句,QQ,其實我無心要妳背叛男朋友。
如今,一切已成泡影,我實在想為自己嘅魯莽而大喊一餐。
瘟:「咁好好休養下啦,落過場都有一分㗎喇,我幫你申請聽日決賽傷退,我會出盡全力跑埋你嗰份!」
屌!使鬼你幫我跑埋我嗰份,你鍾意出風頭就自己出,社嘅績分關我春事咩,講到尾又係一分出席分…我可唔可以轉去綠社為Bubble效力呀?
我:「咁你聽日畀心機,睇好你攞牌…」


瘟:「多謝,咁你個推鉛球…」
我:「得啦,推三下啫,又唔使用腳嘅。」
妖,雖則佢睇落都唔係衰人,但呢下真心煩膠,我只係想佢快啲走,或者派文書財政姐姐嚟呵護備至下我;點知呢個時候…QQ行咗落嚟…
佢同瘟神打咗個眼色示意佢快啲躝屍趌路。
已有 0 人追稿