我怎可能是女神👸🏻獵人🏹（第一季更新至斷更為止）: 463

Q：「好喇，扭完計，放返我出嚟啦。」
我：「嗯。」我就好似隻貓仔咁伏喺佢身邊。
Q：「咪話咗我返學校有嘢做囉。」
我：「嗯，但平時都無咁夜嘅，返去有乜做呀…」
Q：「你知唔知佢哋完咗第一日有好多嘢要搞㗎，要對多一次啲分數統計啱唔啱，要出好晒聽日啲決賽名單，要開始寫網頁update，要將啲相同片過晒落部電腦度，重要討論啲社際比賽用乜策略。」
我：「但呢啲嘢…好似同妳無任何關係。」
Q：「當然啦，我返去就梗係瘟仔啦。」
我：「吓…講真…㗎…」
Q：「做乜呀？一副死老竇咁嘅樣…乜我去瘟仔…原來…係關你事？」佢一副詭異笑容望住我。
我：「無，唔係呀…戥你男朋友慘咋嘛…但係如果妳咁樣…都好似唔太好。」其實如果佢條仔知道自己條女要寄住喺一個男同學屋企已經慘絕人寰。


Q：「講下笑咋嘛，我咁樣返去瘟仔，咁多人喺度，你又估下啲人會唔會唱我臭雞吖嗱，你都唔好當文書財政姐姐流先得㗎，呢兩個真八婆嚟㗎。」
我：「咁…Queenie妳係返去…」
Q：「我返去呢…就係…為咗呢樣…」
然後佢攞住部電話，打開咗一個file。
我：「嘩呀呀呀呀！？」
佢一手搦返開部電話。
Q：「咪搶呀！唔畀你睇㗎！」
電話上面…播住嘅係我仆街嗰短短幾秒鐘，跌咗落地爬返起身再衝線…再跌坐返喺度嘅短片！
我：「點…點解？！妳會有段片？」
Q：「你識問德爺攞我嘅相，你估我識唔識問佢攞返你嘅片吖嗱？」我呆咗…呢個女人究竟重有幾多手段我係唔知？


我：「唔好睇啦，咁樣衰…邊出得街！」
Q：「唔樣衰呀，有個傻仔為咗我搏晒老命咁跑，呵呵，最後一扑一轆，好彩無乜事啫。」
我：「邊係喎，只係第一次落場，唔係好識就個速度，一時失手啫…」
Q：「哦，唔係為我跑，即係唔使要奬品啦。」
我：「唔…唔係呀，我為咗妳，出晒所有力嚟跑㗎，重有個銅牌添！我…應該有…兩項奬品㗎喇。」
Q：「你…成隻色狼咁望住我係乜意思…」
呢個時候，我跪趴咗喺張床上面，用四肢撐起咗個人令到自己個頭同佢成同一個水平，衰啲咁講，我同一隻望住主人求舔舔搖住尾巴嘅衰狗無乜分別；但，當年對住Carmen又豈止於此…
我：「我玩咗兩項喇，有兩啖，惜惜！」
我都估唔到我竟然會咁主動要求佢同我接吻，但係…我實在係忍得太耐，等佢返屋企又等得好苦，而且呢兩下明明就係我應得，我好想快啲…
其實唔止惜，我好想攬住佢推落張床盡情將我嘅愛意發洩落去佢身體上面，但有時我真係分唔清我呢個願望究竟算係對佢嘅愛，定只不過係貪戀佢嘅身體。