我怎可能是女神👸🏻獵人🏹（第一季更新至斷更為止）: 464

Q：「可唔可以…留返聽日先，一次過？」佢喺我面前左手指㧻右手指，一副讕係無辜可愛嘅樣。
我：「點解要等聽日喎？」我扁嘴了。
Q：「咁…要人哋同你惜惜我會尷尬㗎嘛，如果分開兩日我咪會慘慘豬兩次囉，所以我想一次過。」
係…原來同我惜會慘豬，咁妳之前又…
我：「咁唔緊要啦，就留返聽日一次過啦。」
其實我都無嘢迫到QQ，亦唔捨得對佢咁做，雖然係一直都忍到死咁滯，但唔忍…我又可以點。
Q：「畀你睇埋吖，唔係下下都樣衰嘅。」
佢又開咗另一個file，原來係我三千米衝線嗰幾秒，喺呢度睇返，明顯只係差小半個身位。
Q：「我覺得你可以早少少加速，睇你個樣應該可以爆盡二百米，跑到好似阿健個傻仔咁。」
之後佢又畀個wide cam我睇，影住最尾嗰圈阿健點樣死追爛追，而過咗原本嘅第四第五。




我：「咦！點解我衝線段片，係剪接過嘅？」
Q：「梗係剪接過啦，你攞第三咋，唔係諗住人哋全程影住你呀，重有意外都係，佢哋zoom都zoom唔切，係靠crop返大咋。」
我：「即係…妳頭先係去搵德爺…」
Q：「係呀，人哋抄file之餘，重要臨急臨忙幫我剪咗兩段片，所以咪要搞到咁夜先返嚟囉。」
我：「吓…佢特登幫妳剪兩段片，點解嘅？佢點會無端端幫妳，定係妳同佢…」
以我所知，剪接都唔係啲輕鬆嘅功夫，因乜解究…
Q：「喂，你唔好又諗埋啲衰嘢喎，我只係話想要啲相同片，如果佢幫到手嘅話，等到我考完DSE就做佢一次泳裝model咋嘛。」
乜話！咁同賣春有乜分別？
我：「吓！點可以咁㗎？」
Q：「做乜大驚小怪喎，到我考完DSE都大個女啦，咁人哋都想影返輯相留念㗎嘛，我咁靚女無謂嘥咗自己，梗係趁自己最可愛最青春嗰陣嚟影，同埋人哋專業影相㗎，我都信得過佢唔會做啲奇怪嘢，咁佢又有靚女影，一家便宜兩家著啫，普通商業合作only。」




我：「咁都OK嘅，係呢，你叫佢千祈唔好將我仆街段片放上校網或者校園電視呀！」
Q：「咪傻啦，人哋做咗咁多年嘢，自然有分寸。」
我：「但重有一樣嘢…妳咁樣叫佢幫手crop我段片，佢會唔會以為我哋…」
Q：「無呀，我話畀朋友留念㗎咋，佢信又好，唔信又好，我都控制唔到嘅，不過佢呢，就唔係一個多口嘅人，況且無憑無據佢都唔會講啲乜啦。」
我：「咁就好…咁既然段片係畀我留念，妳快啲send返畀我啦。」
Q：「無喎。」佢斬釘截鐵咁拒絕咗我。