我怎可能是女神👸🏻獵人🏹（第一季更新至斷更為止）: 465

我：「點解喎，明明係我好落力跑返嚟！」
Q：「鬼叫你上次唔肯畀跳高張相我呀！而家你都唔會有㗎喇。」
我：「我哋而家交換返吖，得唔得呀？」
Q：「慳啲啦！馬後炮！想用幾MB相換我呢度幾百MB片，諗都唔使諗，而且我重有你上頒奬台同包紮嘅相。」
我：「呀，畀我睇埋啦。」
Q：「無呀，永久個人珍藏，你唔使指擬。」
我望住佢，一副生無可戀咁嘅樣。
Q：「重有一樣嘢我希望你唔好誤會我，我係會花時間去social，但唔好以為我去瘟仔，我係一個好女仔嚟，亦都無諗過要背叛男朋友。」
我：「Sorry…我唔應該咁睇妳嘅。」
都唔知係好消息定壞消息，佢唔會背叛嘅話，即係亦都唔會同我偷情，雖然我都唔知我哋咁樣住埋一齊係叫做咩。




Q：「喂，低B仔你食咗飯未呀？」
我：「未呀，我諗住等埋妳返嚟先吖嘛。」
Q：「傻嘅咩！咁唔通我永遠唔返嚟，你就喺屋企餓到變乾屍咩？」
我：「Queenie…妳會…永遠都唔返嚟？」
Q：「唔係呀，咁講咋嘛，而家呢度係我屋企，我實會返嚟㗎喎，你係咪餓到個肚仔凹咗所以想扭計呢？」佢伸咗隻手過嚟摸我個肚。
我：「一半半啦。」唔通同妳講太掛住妳咩。
Q：「咁就快啲去整嘢食啦！你有無買好味嘢呀？」
我：「有呀，買咗點心，等妳返嚟咋嘛。」
Q：「重有呀，快啲去洗面，唔想見到你個貓樣。」
喺佢面前，我實在係好無用，唉。




蒸落啲點心，煲水淥麪之後，我走去個袋度攞咗樣嘢出嚟。
我：「我有好努力咁去跑㗎。」
Q：「知你叻喇，一落場就有牌，我都未攞過。」
佢將我個銅牌攞上手度摸，睇完正面又反轉睇。
我：「不如我送畀妳吖。」塊牌對我嚟講又無用嘅，只係用嚟證明為咗QQ我可以有幾努力。
Q：「吓…銅牌你都好意思送？就算唔係金牌都起碼係銀牌吖。」
我：「差少少咋嘛…或者等下年囉，妳唔要我睇下可唔可以用嚟做杯墊，不過咁細塊…好似攞落去黃鋁罐回收比較化算。」
Q：「黐線㗎咩！攞嚟先！」佢一手搶咗去。
我：「妳唔係嫌cheap唔要㗎咩？」
Q：「係，但攞嚟做抵押，到你攞到金銀牌再同你換！」呢個女神，真係夠晒口硬心軟。




可以同佢一齊參加陸運會，實在係太好。