我怎可能是女神👸🏻獵人🏹（第一季更新至斷更為止）: 472

中午放飯，健康兩個再次嚟搵我，女神唔喺度順理成章就連埋肥豬細龜去食飯嘞；肥豬唔係同自己班啲男仔關係唔好，只係唔知搞乜佢班得另外兩條仔係紅社，重要係女人湯圓黐埋啲女仔一齊坐，佢懶得同流合污又費事去搵其他男同學就跟埋我哋嘞。
沒有女神嘅餐桌，五個字母學生餐，呢個先係我哋嘅常態，而且我唔使再做落單仔真係一身都鬆晒。
豬：「而家都已經三月，你哋諗好揀乜科未？」
健：「唔使諗，Physics班，最穩陣。」
我：「其實…點解Physics班最穩陣？」
我其實重未研究過邊科打邊科有乜分別，衰啲咁講，我只係想同QQ同班，或者將自己嘅未來交畀呢個女仔幫我決定就算，我對佢有無限嘅信任。
健：「吓，你唔係呀…Physics進可攻退可守喎，讀得好嘅話可以食晒所有Engine科，有Chem又已經可以揀埋醫科藥劑，考得差可以讀Pure Science，唔想再對住啲科學嘢轉去IT，Econ，Finance，Risk Man都有加乘，BBA都寧願你讀Physics好過讀中史啦，再退一萬步揀心理學，社工，Social Science，人類學，哲學呢啲都無輸蝕…除非你一心想讀文學或者翻譯呢啲，如果唔係我睇唔到有乜理由要揀其他科先。」
康：「都要有得你揀至得㗎…」
健：「實有得揀嘅，first choice係你決定填乜就填乜，最多可能係收唔到你啫。」
康：「我都想同你哋繼續做同學，但計數…我真係好嘛嘛㗎咋。」




豬：「咁你千祈唔好咁諗呀！就算嗰科有幾好，你唔擅長嘅話，到時就好大機會fail，咁就乜都無，你都識講你計數唔叻，即係大學都唔會讀Engine，Science，IT呢啲，咁又何必難為自己讀三年Physics呢？當你讀文科死背爛背攞到兩三條四，咪一樣可以讀BBA，或者其他水泡科，係咪？」
康：「你咁講都好有道理嘅…」
龜：「其實邊科叻，想讀乜咪讀乜，我科科都好平均，自己一個讀書就得，邊班都無所謂。」
係嘅，呢個自閉宅男成績係出奇地好。
不過我聽到佢哋係咁講學業我就頭痛，穩陣起見都係返去搵QQ商量下以策萬全。
回到運動場，剩返嘅都係一大堆壓軸項目，包括短跑決賽，班際接力，四社接力，師生校友接力…林林總總；當然我唯一感興趣嘅就係QQ有份落場嘅四百米決賽，明明呢個女仔只係無無謂謂嚟暫住，唔知由幾時開始，我對佢嘅一切都變得好上心。