我怎可能是女神👸🏻獵人🏹（第一季更新至斷更為止）: 478

結果Miss Tang影完之後，幾個我哋班嘅風頭躉就好似攝石人咁黐過去又影埋一份。
健：「你做乜唔過去一齊影嘅？」
我：「做乜要一齊影，佢平時都係咁㗎啦，無乜咁特別啫，你想影咪快啲過去囉。」
健：「唔啦，唔係你，對佢無乜興趣。」
口硬啦你，Queenie個樣正到咁，我諗除咗我之外應該唔會有男人唔想同佢集郵囉，睇怕你都係怕醜唔敢邀請女神同你一齊合照咋；我就話…平時喺屋企乜都有得睇，雖然佢而家呢件衫真係好靚。
鄧：「喂，呀爽，你個銅牌呢？」
我：「放咗喺屋企喇，無拎返嚟。」
鄧：「有無搞錯呀，明知今日影相㗎嘛，嘥晒。」
我哋班都大概有六七個同學攞到牌嘅，好多都掛住咗喺條頸度，不過唔重要啦，一切在心中，呢啲嘢我無乜所謂而且個牌已經唔再屬於我。
擾攘完一輪之後，我哋班都終於齊人，Miss Tang將Queenie放咗喺佢身邊獨佔鏡頭嘅正中間，然後分別用咗幾部電話同相機影相。




最後，終於放學。QQ趁住一個無人發現嘅空檔望住我單咗一下眼，呢下心有靈犀嘅小動作比起千言萬語更加有效，而我都唔諗住再send message畀佢嘞。
好快，我同健康兩個又上咗巴士，不過今日就唔見班大帝一齊迫上車喇，怕且佢哋重喺個場度玩緊唔捨得走。
康：「吖…我想喊呀，重要去補習。」
我：「唔緊要啦，都係溫下書啫，我諗住返到屋企都溫下，有人畀你問下咪重好。」
康：「你做乜轉死性呀，明明琴日放學重成隻死狗咁。」
健：「呢條友都唔知搞乜鬼，呢排神神化化咁。」
我：「你肚唔肚餓呀？不如陪我食埋嘢先返屋企啦。」知道咗唔使等QQ，我想盡快醫好個肚先，再返屋企瞓晏覺等到個女人返嚟。
健：「做乜呀，心血來潮想躝街呀？」
我：「都好喎，食完嘢順便去中心打下乒乓波咯，橫掂著住PE衫重方便。」
健：「麻鬼煩，我返屋企重要食飯㗎，唔似得你咁自由。」




我：「食少少啫，我請你食炸雞髀薯條吖。」
康：「頂你哋吖！重要喺我傷口上面灑鹽，好嘢呀吓…你哋！」
健：「關我乜事喎，你鍾意咪陪佢食嘢囉。」