我怎可能是女神👸🏻獵人🏹（第一季更新至斷更為止）: 479

健：「喂，到底你今日又搞邊科呀？」
我：「無呀，純粹肚餓咋嘛。」
去到快餐店，我真係諗住請佢食炸髀㗎，不過佢都係堅持自己畀；而我呢，就決定起雙飛，嗌咗一個茶餐沙牛麪拼雞翼，再加多個特價嘅迷你焗肉醬意，嘻嘻，汽水都有兩杯呀。
健：「你係…化悲憤為食量？」
我：「唔係呀，開心咪食嘢囉，做乜要悲憤。」
健：「琴日攞牌就黑口黑面，今日…發生乜事…」
我：「因為聽日放假吖嘛！」我隨口講個原因。
當然，而家嘅我可以話心情完全受QQ影響，佢嘅一舉一動都會對我做成極大嘅波動，而呢一刻佢就令我感到好安心；同埋，我知道今晚有得同佢惜惜，所以就趁而家食飽啲到夜晚就可以專心同佢進行口部運動。
我：「你唔開心咩？無搵Kuromi打機咩？」
健：「有，佢話星期五六日可以抽一晚同我打。」




我：「唉，真可惜，我要返工，無得黐你哋一齊上分。」
健：「都唔係呀，佢上咗鑽石，對手難打咗好多，有時都幾大壓力，可能你喺度會好啲。」
我：「啊，你嫌佢水皮呀？又係你自己鍾意帶妹，如果佢好勁就唔使你帶啦。」
健：「嗯…係嘅，我都有啲矛盾。」
同佢食完嘢，我哋又真係去咗青年中心打乒乓波，打到六點幾先走，點知我就喺呢個時候收到一個壞消息。
其實又唔係壞嘅，因為一早都預咗，呢一日要嚟嘅始終都係要嚟；諗太多都唔會有乜結果，返到屋企我沖完涼之後就決定瓹入被竇大覺瞓。
「咔嚓。」世界上最溫柔但又最有效嘅鬧鐘聲。
我：「Q…嗯…妳返嚟嗱？」我側住頭仰視佢。
Q：「嗯，攰就繼續瞓啦，我唔開燈。」
我：「點得呢！」我彈起身坐直個人，然後開燈，落床洗面，執返好個豬樣，洗乾淨啲口水。




Q：「你係咪玩嘢呀！我一返嚟同我爭洗手間用。」
我：「好快…好快…殊殊埋就得。」我閂埋門。
Q：「快啲呀！死仔包，我都好急…」
我殊完，開門出返去，QQ入去閂門，到QQ殊，然後我就喺出面聽住佢尿尿嘅聲音，呢個已經變咗我哋嘅日常，佢啲尿勢收細完之後，我聽得出會繼續維持四五秒到，比我哋男仔長啲。
Q：「喂！你企喺度搞乜鬼呀？！」
我：「等咗妳好耐喇，我要惜惜奬品。」我企咗喺佢前面，上半身好似個鐘擺左右咁拂，揚來揚去等佢唔好扮睇唔到我，而佢就即時反咗個白眼。
Q：「係咁咋…你係咪而家要奬品？」
我：「唔係而家咁要等幾時，唔通要排期？」
Q：「唔使…得得得，我哋出返廳先。」QQ拖住我隻手行返廳，然後望住我。
咁我又望返住佢，佢嘅眼神睇唔出有任何尷尬嘅氣息，亦唔似係要反口或者惡攪我，只係…好似唔知喺度諗緊乜咁；我哋望住…一路望住…唔知講啲乜嘢好，去到某一刻我感覺自己失勢了。