我怎可能是女神👸🏻獵人🏹（第一季更新至斷更為止）: 487

我：「喂，阿健做緊乜呀？」
健：「嗯…食緊飯…嗯…搵我做乜？」
我：「有無興趣今日出去玩下呀？」
健：「玩乜呀…嗯…打波？」
我：「唔係幾好，我隻腳重傷緊…落中心打下傳說，㧻下康樂棋？」
健：「都可以嘅…乜你好悶咩？」
我：「少少啦，有無興趣一齊食埋夜晚，地鐵站上面個商場開咗間新拉麪店，我都想試下。」
呢排經濟情況好返啲，我認我係身痕，同埋老竇就快返嚟，呢兩個禮拜我可以慳返好多錢，又唔使煮飯畀QQ食…
健：「都可以…嗯嗯…嘅…我同阿媽講啦，我順便都想去文具鋪配返幾枝筆芯，不過我唔可以玩到太夜，約咗Kuromi九點打機。」
K生個女…妳好嘢呀下，一日serve三條仔…




健：「咦，唔係喎，你今晚唔係要返工咩？」
我：「係呀，食飽就要趕去返工，你唔使擔心。」
健：「咁四點鐘中心見啦，我做埋啲功課先。」
係喎！我都要做功課喎…聽日QQ就唔喺度睇住我，又無得抄佢功課，都係快啲做完今晚畀佢對。
健：「嘩！你怐到而家先食飯呀？」
我喺中心張枱度，大口大口咁潷啲白飯入口。
我：「嗯嗯…唔係你呀…嗯…無心情…唔煮飯…」
QQ唔喺屋企，即刻無晒心情煮嘢食，剩係淥個公仔麪食好似好陰功，煮多少少嘢又嫌非常之麻煩嘥心機，最佳解決辦法當然係去燒臘鋪整盒半肥瘦叉飯多飯，可惜今日周末無學生價要三十蚊盒，但從性價比角度嚟計，都係贏晒。
唔知QQ同瘟神做緊乜呢？既然瘟神都已經表咗白，唔知…佢哋會唔會拖手仔呢？
同阿健玩完一日，之後就去返工。




嘩！今日順便出埋二月份嘅糧，差唔多有成三千蚊呀！開心死！不過呢…聽朝QQ就要走，唔可以同佢慶祝；咦，係喎，聽晚都重要返工，點樣同老竇講好呢？不過去做嘢搵下錢，點都唔會係壞事嚟掛？
放工返到屋企，QQ已經攬住吉百利瞓緊；都啱嘅，佢聽朝一大清早就要走，早啲瞓係好事…
到咗第二朝八點幾。
Q：「幫我睇下係咪已經執清晒啲嘢…呀！我重未收返埋枝牙擦，好彩醒起啫…」
我：「驟眼睇落…都無特別啦，如果有嘢漏我咪聽日攞返去學校畀妳囉。」
Q：「嗯，咁我都差唔多出門口喇。」
我：「其實又唔使咁急嘅，我爹地話過中午先返到嚟，都重有幾粒鐘。」
Q：「唔怕一萬，至怕萬一吖嘛，點知架船會唔會早咗泊岸喎，梗係預早啲時間比較穩陣啦。」
我：「Queenie…我會…掛住妳㗎。」