我怎可能是女神👸🏻獵人🏹（第一季更新至斷更為止）: 496

咁我媽咪都已經走咗咁多年，佢又未係好老，去交際下都好正常嘅，我衷心祝福佢可以識到個靚靚嘅姨姨或者姐姐梳乎下，但我就唔係太想有個三唔識七嘅女人出現喺我屋企對我指手畫腳說三道四喇。
爸：「無，諗住聽日返廣州探下爺爺嫲嫲啫。」
又係喎…佢唔止好耐無見過個仔，重更加耐嘅時間無見過佢嘅老竇老母，返下去都啱嘅；但如果係咁！即係話？！無理由廣州即日來回掛，佢自己唔怕攰阿爺都會鬧死佢啦！
我：「咁你諗住返去幾耐呀？」
爸：「嗯…返去幾日囉，我諗星期四朝早返嚟。」
聽到佢呢一句，我直頭興奮到小雞雞都想開香檳，睇下啲殊殊重射唔射到兩米遠！不過，我就當然要故作鎮定，唔可以露出啲乜嘢馬腳。
我：「都啱嘅，我會自己照顧自己㗎喇。」
爸：「本來我想星期五等你放學帶埋你返上去玩幾日㗎，不過你而家又要打工，咁唯有遲啲先啦，所以諗住平日返上去無咁迫人，應該會舒服啲。」
其實我理得你去邊，有幾舒服定辛苦，做啲乜嘢吖！最緊要…只要得返我一個人，間屋就係我㗎喇，咁我就可以招呼QQ…
但唔知QQ佢會點諗呢？走走糴糴可能佢都會嫌麻煩，不過，我都係決定盡快將呢個消息話畀佢聽，所以落去返工嘅時候我就打電話畀佢。




Q：「做乜呀？唔係要返工咩，打嚟畀我嘅？」
兩日無聽過佢把聲，實在係十分之悅耳。
我：「唔阻妳吖嘛？唔係拍緊拖掛…」
Q：「咪傻啦，拍緊拖就唔會聽你電話，我一早返咗舅父屋企溫書喇，你有乜嘢就快啲講。」
我：「係咁嘅，我老竇聽日會返廣州，呢幾日會唔喺屋企。」
Q：「真係㗎？！聽日就無人？咁我放學係咪就可以上嚟？」佢把聲鬼死咁興奮，好彩話佢知啫。
我：「我唔肯定佢會幾點去搭車，不過頂籠都係要妳喺學校等一陣嘅啫，佢一走我就會叫妳上嚟。」
Q：「好呀！咁我執定啲嘢聽日過嚟㗎喇，你唔好同我講你爹地又突然唔返去呀。」
我：「應該唔會嘅，但妳咁樣突然過返嚟O唔OK㗎，舅父會唔會問妳搞乜鬼？」
Q：「佢哋邊會理咁多，我一陣同佢哋講我聽日過返嚟兩日先，幫下手裝修就得！」




妳個女神，真係夠晒山草藥，裝修都噏得出嘅，認真講大話唔使眨眼，不過妳開心就得嘞。