到咗第二日返學,QQ個樣明顯同上個禮拜唔同,精神咗好多,呢樣嘢係呃唔到人嘅。
我:「妳…好似好開心咁喎。」
Q:「係呀,嘻嘻。」佢笑到成個細路女咁。
我:「咦,妳乜都無帶嘅,諗住去開喼攞衫?」
Q:「唔使啦,過嚟兩三日咋嘛,我放咗底褲喺書包㗎喇。」意思係Bra都無,簡單嚟講即係話佢都唔諗住喺我屋企戴Bra,所以唔使準備,有而家著住嗰個就得,最多我可以幫佢洗。
我:「但妳諗住著校服訓覺呀?」
Q:「唔想搬嚟搬去吖嘛,人哋諗住…著你啲衫褲咪算囉,實著得落嘅。」
我:「吓!著…著我啲衫褲?!」
Q:「咁人哋同你都住咗咁耐,一早已經無晒矜持,重計較得啲咩喎,你唔好笑我就得。」
我:「我點會笑妳喎,最緊要妳OK啫。」


Q:「只要你惜我,就乜都OK㗎喇。」
都唔明佢當我係乜…兵?小三?情人?契哥?雖然我又真係好惜佢嘅,只要可以提升佢生活質素,我都會盡可能幫佢。
到咗放學,我叫佢喺學校等一等先,而我返到屋企就已經空無一人,但為咗安全起見呢…
我:「喂,爹地…你…出發咗嗱?」
爸:「係呀,羅湖排緊隊,做乜嘢呀?」
我:「無呀,我啱啱放學返到屋企。」
爸:「我知呀,古古怪怪咁,自己搞掂喇。」
我:「嗯,幫我同爺爺嫲嫲say hi啦。」
爸:「得喇,到我過關,唔講喇。」
搞掂,然之後我就叫QQ上嚟搵我嘞。


「咔嚓。」女神當然係自己開門入嚟啦。
Q:「交叉仔!」佢一入屋就即刻攬住咗我。
我:「Queenie…做乜呀?」
Q:「無嘢,返到屋企太開心咋嘛!」
我:「嗯…歡迎妳返屋企。」
Q:「太好喇!我張床呀!我要瞓晏覺先呀!」
我:「唔好意思…我…重未洗過啲被同床單…」
Q:「是但啦,著你啲衫都係咁…你都唔係好污糟啫。」佢嘢都未講完就全套校服咁瓹咗入被竇。
我:「妳唔介意就得,我唔會話自己污糟嘅…」
以前嘅我可能會再污糟少少,但自從同Carmen,細蚊拍過拖,太過份嘅話係會俾佢哋鬧,所以我都習慣咗檢點啲。


Q:「你…唔會…想同我講,你喺被竇入面…做埋嗰啲嘢呀?!」佢突咗半個頭出嚟同我講。
我:「我喺被竇入面咪瞓覺囉,妳係想問我喺入面做乜呀?」我明知故問。
Q:「即係…有無…喺被竇入面J…」越講越細聲。
我:「即係呢,喺被竇入面同交通工具激戰呢啲,都係交返畀妳呢啲專業人士嚟啦。」
眾所周知,佢同男朋友謦電話嗰陣,大概每個月就會有兩三次喺被竇入面產生大量液體同埋雀仔嘅叫聲。
Q:「乜!乜喎!你咁話人㗎…我…唔係咁㗎!」
我:「嗱,我乜都無講呀…雖然張被係香噴噴,但我最後都係忍住咗嘅。」
Q:「嗯…又好似重係我啲味,不過溝雜咗咁…」
我:「我琴晚喺酒樓攞咗椰汁糕返嚟呀,妳係咪唔食呀?我驚再放多陣就硬到變返椰子…」
Q:「食!梗係食啦!」
一聽到話有嘢食,佢又即刻彈返起身,自己就走咗去雪櫃摷嚟食。呢間屋,都係有QQ喺度最好。
已有 0 人追稿