我怎可能是女神👸🏻獵人🏹（第一季更新至斷更為止）: 509

樓梯呀！我跳！平路呀！我跑！有個阿婆呀！我側䟫直角假身！明明…陸運會已經完咗過萬字，點解我重要喺度跑跑跳跳辛苦自己呢？唉…
紀：「呢位同學！咪衝！」
我當然睬佢都傻，作為一個循規蹈矩嘅守法學生，每日「準時」返學都係我嘅常規任務嚟，就喺道閘閂到剩返三十度角嘅時候，我喺條罅中間側身攝咗入去呢間我心愛嘅母校範圍。
點解心愛？因為呢間係有右女神嘅中學。
紀：「喂！呢位同學你遲到呀！」
我：「瘋紀姐姐，何解我遲到呢？」
紀：「遲咗一秒就係遲，呢位同學唔好咁多藉口，快啲攞張學生證出嚟畀我摘名。」
我：「但我入咗嚟喇喎。」
紀：「我閂門要時間，就算你入咗嚟都係遲到。」
我：「咁即係你本身遲咗閂門，下次早兩秒閂啦，今次就唔計喇。」




紀：「乜…乜唔計呀？！你同我企喺度！」
我：「客觀嚟講我淨係知我喺正門入咗嚟，其他同學都係咁，如果我係遲到，其他所有喺你閂門前返嚟嘅同學都可以話佢哋遲到啦。」
紀：「你唔好強詞奪理，遲唔遲到係睇時間，而唔係睇道門，唔該你遵守校規。」好個一面凜然。
我：「咁就更加唔應該摘我名，呢度有無錄影計時系統吖？無吖嘛，我衝線嗰下都唔會望住隻錶啦，再講嘅話我投訴你唔準時閂閘。」
紀：「你！」我無理佢繼續行上課室，剩返一個激到死死下嘅眼鏡姐姐喺度，睇佢個悶蛋樣應該都唔會有仔睺佢，祝佢潛艇升降平安啦。
呼，好彩Miss Tang重未上嚟，雖然佢唔會對我點樣，但我都唔想畀佢煩。
Q：「搞乜鬼呀…明明一早起咗身。」佢細細聲講。
我：「無嘢，一時意外，好彩趕得切。」
然後，有隻麻煩友行咗過嚟我枱邊。
健：「喂，你琴晚搞乜鬼？」




我：「咪覆咗你囉，部電話死機我都唔想。」
健：「死機？但我見你唔係斷線，只係留喺泉水唔郁，send message畀你係雙剔，打電話畀你都通㗎喎。」
我：「我都唔知㗎，總之我就控制唔到部電話，成個屏幕白色，可能剩係死咗個顯示掛。」
健：「有咁怪嘅壞法嘅咩…」佢一塊面狐狸疑惑。
Q：「乜呢條友打機掛機呀？死罪嚟㗎喎。」
健：「咪係囉，重要之後成粒鐘無反應。」
Q：「捉佢去happy corner啦，唔抵幫。」
健：「我都想，但得我一個人操控唔到佢。」
Q：「我幫唔到你呀，我只係一介弱質女流，最多可以幫你推佢埋去corner度。」
我：「哎呀，唔好咁黐線啦，我都知累你輸咗好唔開心，但我都唔想㗎嘛，今晚繼續努力啦。」




健：「你好賠返粒星畀我呀！你係咁，Kuromi又唔知搞乜！」
我：「Kuromi應該唔係…」QQ佢用凌厲嘅眼神（目屈）實我。