係喎,我同Kuromi一齊斷線,我無理由知道佢斷線呢件事㗎喎;我重諗住幫佢解釋添,差啲就出大件事,好彩QQ本人制止咗我一失足成千古恨。
我:「佢…應該唔係好上心嘅啫,無鬧我呀?」
健:「你話呢?人哋見你過嚟救我,專登走埋嚟支援,結果你放完個治療之後就企喺度唔郁。」
吓,佢唔係應該問做乜我哋一齊掉線嘅咩?點解…唔通想試我?不過佢講乜我就順落去啦。我重記得QQ開完個範圍大,就掉低咗部電話。
我:「起碼…最後都有個治療吖。」
健:「有鬼用呀,以為你幫手坦,結果累我哋留喺原地送死,早知你唔好嚟幫手重好。」
我:「不過…四打五都輸梗㗎啦,所以算啦…」
健:「算乜嘢算!Kuromi發晒脾氣呀!」
吓…K生個女咪喺我隔籬囉,發乜嘢脾氣呀?
我:「咁…不如我一陣send個game message畀佢道歉,邀請佢今晚再戰,我會加倍努力賠罪。」


健:「得喇,我會幫你解釋,唔使勞煩你,我約到佢嘅話你記得準時出現呀下,如果唔係佢嬲嬲豬我就唯你是問。」
搞乜…佢係咪想營造個感覺出嚟話我知佢同Kuromi嘅關係有進展?我完全唔知呢個小朋友喺度諗緊乜,Kurom有乜好嬲,明明佢就同我一齊出意外掛機;呢個時候QQ望住我都有啲唔知點,但好彩嘅係阿健嘅反應都算正常,應該係信咗我哋兩個嘅藉口。
無風無浪之下就繼續上堂。
今日有兩堂科學堂,終於教到去萬眾期待…又或者有好多人唔想上嘅青春期同性教育堂,呢樣嘢通常係中三下學期教嘅,如果再唔教嘅話…下年讀文科又或者無讀生物學嘅小朋友就會乜都唔識;你知啦,安全套戴反咗係會死人,正反面各用一次就更加死人,安全期計錯又係死人,可樂洗陰道就算殺得死精子搞到下面發炎都唔好啦。
教科學嘅係一個生咗兩個仔嘅阿太,都幾大波下,師奶樣唔會令人有乜幻想;都好嘅,相信可以令大家冷靜啲咁上堂,試問如果呢啲topic畀Miss Tang教嘅話…就唔係幾好啦,雖然佢唔係話好靚女或者行乜性感路線,但始終太後生講呢啲嘢都會令人面紅耳赤。
而阿太決定調返轉嚟教,由避孕開始講起,係咪咁樣會易啲適應?因為避孕係重中之重?定係已經假定咗我哋知道晒做愛係乜嘢嘅一回事?如果連男仔點放入去女仔身體入面都唔知,咁樣教點用套先好似有啲怪喎,不過呢個年代我哋個個都係睇AV大嘅小朋友…
太:「各位親愛嘅同學,相信你哋都知乜係condom㗎啦,但知係乜唔等於識用,我知你哋可能有人用過嘅,不過就唔使同我講喇,你哋重咁細個,為咗等你哋更加瞭解清楚呢樣嘢係乜,我準備咗段video畀你哋睇,你知啦,你哋平時睇開嗰啲…我想講係啲男同學呀,都無教你哋點用嘅,不過唔使咁擔心,段片係用模型嚟教嘅啫,本來我想播實物㗎,但我實在太驚俾家長投訴。」
呢個阿太…都唔知話佢風趣幽默好吖,定係煩好吖喇,不過就起碼唔係太悶嘅。
然後先生熄咗燈,projector播起一段教學影片。
都好嘅,正正經經學下點用,反正無正式學過。


但…好悶…好慢…重全英文,撕開包裝都用三十秒…
已有 0 人追稿