爸:「仔仔妳唔食瀨尿蝦嘅?」
我:「欸…要拆殼好似好大工程,留返畀Queenie啦,我食蟶子就得喇。」
爸:「哎呀,你隻嘢吖,Lego你就識砌,蝦殼同我講唔識拆?有好嘢食唔食咁大嘥,Queenie妳食晒佢得啦,唔使留畀個衰仔。」
我:「Econ都有教要分工合作啦,我鍾意食蟶子多啲,一人負責一樣咪啱啱好囉。」
其實蟶子我都係普普通通㗎咋,主因係琴晚喺電話入面隨口噏,呢種好似蜆肉溝魷魚煙煙韌韌嘅感覺呢…主要係個汁好味送到飯囉;我認我係一個對食無乜要求嘅細路仔嚟,只要日日有叉燒飯就可以完全解決到我嘅糧食問題。
Q:「但Econ都有教要diversification喎,選擇過度單一係會降低效率,增加風險。」
我:「乜乜乜崎唇話?」
Q:「你唔識㗎喇,下年讀Econ先有得讀,今年試讀無教到咁深。」
我:「唓,咁妳又會識嘅?」
Q:「你理得我吖。」


妳個女神吖,分明係同條仔溫書嗰陣學返嚟啦。
我以後都唔會玩嘢玩埋自己,直接話我想食燒臘斬料就算,咁樣爹地唔使煮得咁辛苦,我又可以食得更加痛快;不過呢,QQ真係好熱衷於拆瀨尿蝦,有錢人嘅小朋友確實係唔同啲。
爸:「Queenie食埋佢啦,唔使客氣㗎。」
Q:「點好意思喎,我已經食咗三隻喇。」
爸:「唔緊要喎,我食兩隻夠喇,個衰仔唔食妳就食埋佢啦。」
然之後QQ又繼續拆佢嘅蝦。
Q:「嗱,麻煩友,剝埋畀你喇,蝦都唔識剝。」
然之後佢將一條原隻剩肉瀨尿蝦放咗落我隻碗入面;Yeah!我贏咗,女神親手拆蝦畀我食,一定係最好味嘅!
爸:「你話你係咪醜怪吖?竟然要個女朋…女同學幫你剝瀨尿蝦嚟食。」
我:「咁…我又唔係一定要食…唔該Queenie囉。」


話雖如此,但我已經咬咗半隻蝦落個嘴入面,只要係QQ喂我嘅就乜都會食,唔包括屎,亦唔包括瀨屎蝦。
而QQ亦都食埋最後嘅一隻蝦。
食完落肚之後,都會諗返起佢哋頭先彈下彈下個陰功豬樣,不過我都慣,因為喺酒樓我就已經成日對住佢哋,不停觀察佢哋嘅生死輪迴。
爸:「Queenie唔使執啦,坐低等我嚟得喇。」
Q:「點可以喎,我又食又住,一定要做返啲嘢嘅。」嗯,QQ今次終於做返個誠實乖巧嘅好女孩…
爸:「有乜所謂呢,你哋平時都要自己做返㗎啦,我而家放假又無嘢做…」
但係QQ無理到佢已經迮迮臨搬晒啲嘢入廚房。
我:「咁我嚟幫妳手吖!」我又走埋入去。
Q:「幫乜鬼喎!呢度邊有咁多位企。」
我:「唔緊要啦,我好瘦㗎咋。」


Q:「你咁講係乜嘢意思呀?!」
我:「意思…意思咪就係妳都好瘦,所以咪有位企囉。」
Q:「算你啦。」然後我就喺度睇佢洗碗。
平時我煮嘢呢,都係粉麪為主,斬料就原袋或者原盒上唔會再蒸,所以其實無乜好洗,甚至乎係沖下水再抹乾就搞掂嗰隻。
已有 0 人追稿