我怎可能是女神👸🏻獵人🏹（第一季更新至斷更為止）: 535

諗嚟做乜，我已經有一齊住嘅QQ。
我再望一望周圍有乜熟人，咦，細龜原來坐咗喺Wendy嘅前面，佢真係好唔起眼，唔留心睇係會發現唔到佢；今次佢嘅隔籬又係一個好普通嘅女仔，不過喺佢隔籬放任何女仔都唔會有分別㗎喇，唯一用途可能係放完復活假返嚟換季俾我望下透Bra帶…
吹呀，雖然喺屋企日日都有女神Bra睇，但如果有民女透Bra帶我都唔介意欣賞下㗎。
放學鐘聲亦都隨之而響起。
W：「咁…放完假返嚟再見喇，以後多多指教。」
我：「嗯，睇怕我哋會一齊坐到暑假。」
W：「我哋…會做到friend㗎可？」
我：「應該得掛…」
W：「咁bye bye喇。」講完佢就離開咗課室。
搞乜鬼…奇奇怪怪咁，做乜煞有介事咁同我講呢啲嘢？乜同我做friend好有價值嘅咩，應該無乜著數㗎咋喎…




咦，係喎，我重未抄低有乜假期功課添，正當我攞返本手冊出嚟望住個黑板，我先驚覺抄手冊都係一樣功課嚟，成廿幾樣功課想抄死人咩，諗下諗下都係唔好抄，橫掂我返屋企可以睇QQ本手冊，加埋佢都會幫我對下功課，所以問題不大。
退一千步，最多欠兩三樣到放假返嚟先算，所以都係唔抄喇，等我投入去假期狀態先。
健：「搞乜鬼你呆咗咁呀？」
我：「無呀，沉醉緊喺放假模式之中，發下怐愗。」
健：「定係無得再同女神坐唔開心呀？」
我：「唔關事喎，我無乜所謂。」
健：「真係無所謂？通常呢啲…唔再一齊坐之後就友情不再㗎喇喎。」
其實佢係講得無錯，但我無所謂嘅原因當然係我哋都已經一齊住，重有乜好擔心，係比較驚下年同唔到班，咁佢就照顧唔到我。
我：「無嘅，隔籬位呢啲，流水friend嚟嘅啫，如果以後真係唔再friend咪由佢囉。」
健：「你真係對人哋無嘢？」




我：「無喎，靚女攞嚟昅下嘅啫，可近觀而不可褻玩，唔通要我供奉佢咩？」
健：「如果供奉佢有得食埋，咁供唔供？」
我：「供！打死都供，但現實係無可能發生。」
康：「唉，佢又有乜所謂吖，今次又同女仔坐，都唔知點解你會咁好彩，我成年都係同仔坐。」
健：「同我坐好失禮咩？起碼有得一齊打下機。」
康：「重好講，電話都俾人沒收咗，係睇你打咋，我自己就玩貪食蛇…而且今次你都有得同女仔坐…」聽落又真係好淒涼咁。