幾咁艱難,終於完成咗男仔嗰part。
然後我望住女仔個T字形發呆。
我:「借女仔嗰part嚟抄下吖,呢啲我唔識㗎。」
Q:「乜嘢唔識呀?!唔識咪喺書入面搵囉。」
我:「又uterus,又ovary,我點知邊度打邊度…」
對我嚟講,女仔嘅器官係一隻好似鮑魚咁嘅東西,完全唔明呢個T字形係乜構造。
Q:「唔知咪學囉…你估我哋又好知咩,用你就識用,瞭解下入面係點都唔太難啫。」
我:「用係用出面,點會知入面係點喎。」
係囉,學牙仔點食嘢都有用啲吖,起碼知要點擦牙,學埋個胃嚟做乜喎,如果個胃有事重唔去睇醫生咩,唔通對住本bio書度下自己係胃痛定腸痛?
Q:「哈,剩係出面,唔知邊個放咗啲嘢入細蚊身體然後流咗去uterus度呢?」


我:「都唔知幾耐之前啦…重好話我,妳自己咪又係咁,小心入得虎穴多終遇虎子呀。」
Q:「喂!你又亂講乜呀,溝埋啲中文嚟講嘅…係喇,我知我曳呀,我無唔認,所以而家咪要學囉。」佢個樣就好似同人講曳係理所當然咁。
Q:「係呢,你會唔會想有自己嘅小朋友?」
我:「吓…做乜問我呢啲…咁長遠嘅嘢喎,我哋都重係小朋友嚟,點知第時會點。」
Q:「我喺度諗,如果唔想有小朋友嘅話,好似趁早紮起條管就最方便,一了百了。」
我:「係嘅…咁就真係唔使煩,任做任射唔嬲。」
Q:「梗係唔係啦!唔會有BB啫,防唔到性病㗎,你係咪唔記得disadvantages呀,所以…都只係可以同自己信得過嘅人亂嚟。」
我:「嗯,知道,但要下呢個決定好似都唔易,大部份人應該都會想留返個機會畀自己。」
Q:「咁人係自私嘅,梗係想將個彈性留返畀自己,但如果無心機湊小朋友,又畀唔到個好嘅環境佢,可能只係搞到大家都唔開心。」
我:「Queenie…妳無嘢吖嘛,唔開心?」


Q:「無…我都大個女,唔再喺小朋友嚟,重邊有資格諗呢啲…再者,我都叫做已經幸福咗十幾年,乜都試過玩過去過,好過好多人…其實由細到大都知道媽咪佢係亂咁嚟,所以唔會怪佢,至於爹地,我都唔識講,而家只係希望佢哋無事。」
我:「嗯,我諗…佢哋都實有辦法嘅,如果唔係點生到妳呢個咁叻嘅女出嚟。」
Q:「其實我唔覺得自己叻,只係由細到大,用錢堆砌出嚟啫,開咗個頭,就會識自己行落去,慣咗會溫書做功課…咁…你細個嗰陣開唔開心?」
我:「我呢就…都無乜特別嘅,其實我都唔知爹地鍾唔鍾意湊我,每次佢返嚟見到佢又好似幾開心,但佢又鍾意行船呢份工,唔會話唔捨得我,婆婆湊我嗰陣就…雖然佢唔係老古董,但同我又可以有乜交流喎,都係接我放學,同我一齊買餸,去中心捉我返屋企開飯,佢陪我睇下卡通,我又陪佢睇下劇,平平淡淡就一日,可能佢怕我會唔開心啦,所以佢都好少同我講媽咪嘅嘢,相對上嚟講我算係好自由,小學已經成日喺條街或者公園同其他細路玩,打下架又搞下破壞…大過咗又可以識下女仔,可以做自己鍾意做嘅嘢,咪就係咁…」
Q:「咁你而家開唔開心?」
我:「開心呀,有妳陪我做功課不知幾好。」
Q:「咁你就專心啲做唔好怨天尤人啦。」
我:「知道!等我即刻填返vagina上去。」
此時此刻,Queenie,妳就是我的一切。
已有 0 人追稿