「喂!係呀!兩場即場波膽二穿一,曼聯同阿仙奴各入多一球…我知呀!唔係第一日買…得返十分鐘唔夠個賠率實跳啦,你唔使覆賠率喇,快啲入!入到佢食飛為止,食先同我講賠率啦,越冷越好呀!我無話停你都同我繼續入!交叉仔!藍妹一枝!」
今日週六,又係一班阿叔喺度搏殺嘅日子,我就當然慣晒做佢哋嘅啤酒仔,而馬叔叔亦都會趁今日呢段時間做多啲埋數、check貨、落訂單、計糧呢啲嘢,亦都會間唔中同啲阿叔吹水,所以都會盡人事由佢哋睇波到起碼十二點…
重有…可能因為由於佢哋懶得諗餸,今晚係食自助火窩,所以我就有排都唔使執,佢哋一路睇波,一路竭盡全力咁清晒個counter,雖然廚房已經無肉出,但執碗生菜蘿蔔魚蛋水餃烏冬咁,食下又幾粒,食下又幾粒,我唯有等佢哋清完一兜先執起,橫掂我都唔想浪費食物,咪由得佢哋長期作戰。
不過呢,呢啲嘢我平時都倒唔少…其實我係可以攞返去嘅,但始終餸頭餸尾,質素又普普通通QQ應該唔會食,加埋放咗咁耐其實已經唔多擺得,一係就即刻食囉…所以我通常只會攞白飯同甜品。
我:「係,藍妹到喇。」
「喂,啱啱條飛落唔落到呀?」
「落咗啦,成分幾鐘先落到,升到過百倍呀!」
「邊有人咁買㗎,得返五分鐘唔夠。」
「你理得我吖,你咁叻不如買返原位波膽攞嗰一點二定一點三倍囉,買一皮有二千㗎!」
「咁如果真係是但一邊入多粒我咪仆硬街?」


「係㗎喇,咁你重質疑我?我而家如果輸晒都係唔見一嚿,咪當係支持下我嘅兩隊愛隊囉。」
「真係刀仔鋸大樹,祝你好運。」
其實,我都叫聽得明佢哋講緊乜嘅,踢波嗰時啲大哥哥會一路賭,有時會氹我夾埋一份,但我實在係無乜錢,所以都係無玩過…加埋我見佢哋唔係成日贏,買得細可能來來回回一百幾十蚊內,但又不停咁睇,我寧願攞啲時間玩好過。
其實賭錢係咪真係咁興奮刺激呢?如果我有好多閒錢都會想試下嘅,但一諗到QQ嘅爹地…我都係乖乖地賺錢慳慳地過日子算。
咦…點解…
我:「Queenie…妳…」
佢喺門口入咗嚟,然後坐咗喺近門口嘅枱度。
已有 0 人追稿