Q:「個經理推啲箱出去見到我,問我係咪等你…然後,佢就叫我入嚟坐…」
我:「吓…佢點解會知妳係喺度等我?」
Q:「我都唔知呀,只係諗住咁小事,無謂講大話呃佢啦,佢又唔識我嘅。」
我:「咁都無所謂嘅,妳…落嚟等我放工?」
Q:「嗯,無嘢做…想落嚟行下咁…」
我:「咦,妳手上面呢本乜嚟㗎?」
Q:「Vocabulary handbook囉,得閒咪記下生字,到作文嗰時咪可以有字攞嚟用。」
我:「妳真係勤力,落嚟散步都可以一路溫書…」
呢個時候馬叔叔都入返嚟樓面。
馬:「我上次都見到阿妹喺出面等人,就估佢實係喺度等緊你,入嚟坐住等啦。」


我:「呀…唔好意思。」
馬:「使乜咁見外喎,得返三台客,又唔會阻到人嘅,無謂要靚女喺出面食風啦。」
講完馬叔叔就行開咗繼續做自己嘢。
我:「咁…妳坐係度等下啦,啱啱又有枱客走,我去執嘢先,使唔使斟杯茶畀妳飲?」
Q:「唔使喇,唔增加你工作量,不過呢,可以咁樣睇你做嘢其實都幾得意。」
我:「呀…有乜好睇喎,不過你鍾意啦。」
除咗賭波枱阿叔,其餘兩枱都埋單走人喇,我當然又要去清返枱杯盤狼藉,倒走啲廚餘,疊好啲碗碟,摺好塊污糟枱布,再換過塊新,執好聽朝啲點心紙放上去,check下有無牙籤。
「嘩!掂呀!入咗呀!睇清楚!補時入咗呀!」
「屌!得返最後幾十秒都入到,黐撚線㗎!」
「服咗你!可以陪個仔放復活假啦!」


「咪玩啦,公司俾先得㗎!咁開心,等我嗌多round藍妹先,我嘅!」
佢哋嘈到拆天咁,我當然知道又要服侍佢哋,但我喺度摺緊枱布,都要包埋佢先,然後再抹手…
然後我留意到啲叔父掐咗QQ埋去,雖然QQ一面茫然咁,但都係行咗過去,而我見到咁嘅情況當然係即刻衝入後巷掉嚿枱布落籃,再一馬當先衝返出去睇下乜嘢料。
我:「咁多位叔叔,係咪要藍妹呀?要幾多枝?」
「走呀,唔要你,你隻手污糟,咪整到我哋啲酒油淋淋。」屌,平時咪又係咁…
「係呀!我哋已經搵咗阿妹佢幫手,要人頭藍妹。」搵得QQ去,都估到乜事。
已有 0 人追稿