我怎可能是女神👸🏻獵人🏹（第一季更新至斷更為止）: 548

我：「唔好意思呀，佢唔係啤酒妹嚟㗎，都係等我嚟幫你哋得啦，我可以去洗手先。」
「吖！做乜呀？驚我哋食咗你條女呀？」
我：「唔係，不過啲酒咁重，我擔心佢啫。」
「哎唷，交叉仔佢擔心女朋友仔呀！」
「真係好sweet呀！好青春呀！」
我：「對唔住呀…呢位女仔…唔係我女朋友嚟…」
「吓！乜料呀？半夜三更落嚟接你收工都唔係你條女嚟？你點搞㗎！」
「咪係囉！平時我哋點教你？做男人要有氣概，同你個名一樣要爽朗爽快，豪氣主動！」乜有咩…
「你而家咁樣係咪諗住食完唔負責呀？！人哋落到嚟等你，聽到你一句佢唔係你條女，有乜感想？」
「嗱，係你而家唔認數咋，就唔該你返去做自己嘢，唔好阻住我哋邀請阿妹幫我哋攞酒。」




我：「…」
Q：「咁多位uncle，唔好意思呀，多謝你哋嘅好意，但我同佢只係同學嚟，係好朋友…」
「聽唔聽到呀？同學咋，重派好朋友卡畀佢。」
「唔係，計我話，佢哋一定係怕醜，玩地下情！」
「嘩，咁刺激呀！回想阿叔當年會考，同班入面個女神一齊去自修室溫書，溫到悶就去後樓梯進行秘密活動…可惜呀！會考差兩分入唔返原校，各散東西，女神重俾人溝埋，嗚嗚。」
「你咪癲啦，重想當年，你個女出年考DSE喇！」
Q：「唔緊要啦，就等我幫咁多位uncle攞啤酒，麻煩你哋等一等呀下。」
QQ望一望我，同我打眼色話佢搞得掂。
「喂，無叉用嘅叉仔，幫我哋問下馬神重有無下酒嘅小食，錢唔緊要，照計返就得，入我數！」
嗯…贏完錢嘅叔父，真係財大氣粗，搵著我嚟攪。




其實七枝藍妹都兩嚿水有多，夠出我半日糧…
我指一指雪櫃個位置畀QQ睇，佢就行咗去抽兩枝出嚟，憑佢隻手起碼要走三轉。
而我就走去同馬叔叔講。
我：「馬叔叔，佢哋有人中咗條超冷飛，贏咗成皮，問有無啲下酒小食，任你開價喎…」
馬：「吓…又會咁好彩，但廚房無晒人㗎喇喎，等我諗諗先…蒸啲金錢肚畀佢哋？有排玩喎…呀，既然贏咗錢，就咁啦。」
馬叔叔佢開咗個食材櫃，攞咗兩罐鮑魚出嚟。
我：「嘩，食鮑魚咁富貴呀？」