我怎可能是女神👸🏻獵人🏹（第一季更新至斷更為止）: 562

不過呢，我都覺得如果想搵錢嘅話，努力同乜都肯做係好重要，而且睇呢個姐姐個樣都唔似讀到書，唯有配合下佢啦…睇返交叉仔，雖然成績同我差好遠，但而家我係確實俾佢養緊，我實在講唔出乜嘢書中自由黃金屋嘅廢話。
妹：「呢度都算係咁啦，做嘢唔算太辛苦，高過最低工資少少，又可以扮下靚，啲客人又會鍾意自己，唔會下下都俾人鬧。」
睇嚟佢都幾樂觀，可以將啲宅男嘅視姦同埋性幻想睇成係對自己嘅欣賞…雖然，都起碼證明咗妳有少少姿色，可以擔起呢份賣弄外觀嘅職業。
我身為一個靚女去評論其他女仔嘅外觀或者唔係幾恰當，但真係要講嘅話…客觀上沙織好過細蚊啲嘅，個樣cute少少，皮膚就白啲滑啲，條短裙，個妝，同埋啲假睫毛都有加分。
同沙織吹咗一陣公務水，就聽到廚房入面有叮一聲，佢就衝咗入去捧嘢食出嚟；首先係一碟肉醬意粉，下一轉就係蛋包飯同埋一杯粉紅色嘅嘢飲，全部都係個肥仔嗌嘅，望落個樣都係咁啦；如果交叉仔喺度嘅話，一定會話搵笨，落去OK買個叮叮意粉加飯飯店實際好多，分分鐘重會好味啲。
而我心諗，你日日喺屋企對住我，食白麪包飲清水都咁開心啦，又點會明到宅男嘅痛苦。
嚟得呢度都係釣勝於魚，醉翁之意不在酒，只見沙織對住個肥腯腯嘅肥仔微笑，輕輕彎腰咁幫佢喺個蛋包飯上面寫字；雖然無得掂，但呢個企喺身邊嘅距離已經足夠啲毒撚可以聞到少女嘅香氣，睇到白滑肌膚上嘅毛孔…
最搞笑係個肥仔竟然唔係將啲集中力放喺沙織上面，而係一副勝利者嘅姿態嚟斜視住我…點啫，係咪一次過點兩碟主餐好威？嗰少少錢…係囉，好威囉，加加埋埋都成兩嚿水，今時今日小妹我係食唔起，我亦都唔想增肥，好心唔該你去照下鏡先…
算，唔諗太多，佢唔關我事，我嚟係另有目的。