妹:「女僕長話妳可以入去喇。」
廚房道門係四十五度半開嘅,我做下樣敲咗兩下門就入咗去,呢度個空間明顯地係比起出面熱,都有少少油煙味,其中一邊係有窗望出去見到旺角密密麻麻嘅大廈;狹窄嘅空間入面有一對電磁爐,一個焗爐,一個微波爐,一個電飯煲,一部咖啡機,再加一個好高嘅雪櫃,當然重有唔少嘅器皿同餐具。
而何小姐就坐咗喺爐頭前面嘅一張圓形膠凳上面,有少少身水身汗咁款;佢嘅外表同我想像中嘅女僕長有好大出入,無化妝,紮起咗頭髮,上身著住一件露腰嘅T恤,而且重將個短袖摺到變背心咁,下半身就係一條牛仔熱褲,重有一對休閒鞋;我諗佢年紀大概廿到尾,樣就普普通通,有少少肉地,大髀同心口都有飽滿嘅感覺,不過呢…呢啲都唔係重點嚟嘅。
我:「何小姐妳好,妳可以叫我做Queenie,中文名係茜旎,請問妳哋呢度係咪請女僕侍應呀?」
我有諗過稱呼佢做何小姐定係女僕長好啲,但既然我而家都重係外人嚟,諗落叫佢做何小姐應該穩陣啲。
何:「係呀…妳應該係睇到我哋個IG page先嚟㗎啦,唔好意思呀,我唔係幾方便出去同妳謦,要妳迫喺廚房同我講嘢,如果妳唔介意嘅話可以坐喺呢度啲嘢上面。」佢指一指放地下嘅兩箱忌廉湯。
我:「多謝,不過唔使喇,我唔攰,企喺度就得。」
何:「嗯…咁樣,我想問下妳有無任何嘅工作經驗?有無做過侍應?或者快餐店呢啲。」
我:「無呀,我未曾做過嘢㗎…」
何:「妳對女僕有啲乜認識?係咪好有興趣?」


我:「其實就…無乜認識嘅…主要係想搵一份兼職,咁我都知道要做嘅嘢同侍應差唔多,不過就要打扮得好啲,而且更注重服務質素。」
何:「係呀…妳…有無玩過cosplay㗎?」
我:「我未玩過cosplay…」
何:「咁,妳對日本文化有啲乜嘢認識?」
我:「我都好鍾意日本呢個國家,自己都去過四五次,我好欣賞日本人嘅自律同禮貌,每次去到飲飲食食同買嘢都會好滿足,我亦都好欣賞佢哋嘅傳統文化,例如祭典,和服,茶道同溫泉呢啲。」
何:「嗯…」何小姐突然變得沉默落嚟,一雙眼定睛咁望住我個樣,攪到我有啲唔知點好。
已有 0 人追稿