就係咁,我睇住佢出門口;返工嘅佢同平時拍拖或者約姐妹好唔同,只係求祈襯衫著得好樸素,是但喺塊面畫咗幾下就算…都啱嘅,搵食嘅嘢,做夠咪算囉。
目送佢去返工,原來係咁嘅感覺,有啲怪怪地咁;而家我哋一齊返學,一齊生活,輪流返工搵錢,重時不時會有啲曖昧時刻…彷彿真係變咗家人…好似一對夫妻…嗯,如果有得好似打機咁save就好,等我整條SP路線,玩到爛就load save,又可以試下凌辱路線,我好想知佢會選擇屈服定反抗…
※※※※※
好!今日係人生第一日返工!要畀心機!
「叮噹。」
姐:「こんにちわ,妳梗係Queenie妹妹嚟嘞。」
我:「係呀,今日第一日嚟返工,請多多指教。」
姐:「妳好,妳可以叫我桃子,即係Momoko(ももこ),屬性係御姐,人設係熱情得嚟做事認真,星座係白羊座,最鍾意嘅動物係貓。」
…乜自我介紹要咁複雜…睇嚟呢個圈係有佢哋獨特嘅文化,唔知我學唔學得嚟呢?
我:「Momoko妳好,我都鍾意貓嘅。」我諗…以佢哋嘅哈日性格,應該比較鍾意人哋讀日文發音掛…


姐:「嗯,非常好,妳入去搵女僕長先啦。」
我心諗,呢度嘅女僕長可能先係最正常嘅一個,最唔似女僕,現實世界總係充滿反差。
我:「女僕長妳好。」我輕輕點頭鞠躬。
何:「咁早就嚟到嗱,真係乖。」佢對我微笑講。
我:「咁我都要準備下嘅,而且換衫需要時間。」
何:「套衫妳啱身吖嘛?」
我:「OK呀,琴日著咗一次,無問題。」
何:「咁就好,妳可以選擇行出去廁所換,但要行一個L型,嗰邊有間模型鋪同耳機鋪,可能會撞到啲仔喺後樓梯食煙,不過我就已經同佢哋老細講過吩咐啲員工唔好騷擾我哋啲女僕,同埋呢…公廁嘅衛生情況都只係勉強過得去,如果妳唔介意嘅話,都可以選擇喺度換嘅。」
我:「無所謂呀,我喺度換就得。」
於是我就交叉手除咗件T恤出嚟。


何:「身材真係好,實在係青春無價。」
我:「妳客氣喇,女僕長…」都唔知點回應佢好…
何:「雖然唔係太清楚妳點解做呢份工…但一般嚟講呢,啲女僕好多時會遇到某一類問題…出嚟做嘢記住要帶眼識人,唔好受金錢誘惑,千祈唔好問人借錢,知唔知?」
我:「知道,我會小心。」
我著咗套女僕衫上身,何小姐就幫我拉返整齊,tune靚個蝴蝶結;佢專登喺廚房入面放咗塊全身鏡喺度,我望住鏡入面嘅自己,從來無估過自己會成為一個女僕。
已有 0 人追稿