我怎可能是女神👸🏻獵人🏹（第一季更新至斷更為止）: 573

「叮噹。」
妹：「御主人樣…」
入嚟嘅係我上次嚟見工見到嗰個死肥仔，沙織帶咗佢去其中一個位坐低。
妹：「唉，又撞正佢。」佢走埋嚟同我講。
我：「做乜呀，佢好難頂？」我心裡有數得很。
妹：「睇個款都知啦，肥屍大隻，個樣串串貢，成個殘民以自肥嘅嗰啲暴君咁，十足十董卓或者商紂，又或者技安。」
佢啲比喻又真係幾搞笑，小妹我當然知董卓同商紂係邊個，好歹我中史嘅分數都名列前茅；但係呢位姐姐仔話佢讀唔成書…我諗，佢嘅認知來源係嚟自於打機掛，畢竟交叉仔對三國同戰國啲人物都如數家珍咁，相信我唔會估錯。
我：「咁我信妳啦，我會小心啲。」
妹：「嗯，將佢交畀我負責，妳服侍其他客人。」
肥：「噓噓…Saori chan！」肥仔一個口哨就呼喚咗沙織過去落單，態度極度輕佻無理貌。




呢個時候，唔該唔好同我講客人永遠是對的。
我喺隔籬聽到，肥仔今次嗌咗一個蛋包飯，一個芝士焗豬肉腸意粉，一個跟粟米忌廉湯，一個跟calpis檸檬沙冰…我深信，一個人係唔會無緣無故咁肥，一定係中咗卡路里毒。
如果交叉仔喺度嘅話，一定會話呢堆垃圾食物同茶餐廳入面嘅學生餐有乜分別…有呀，我同你去茶餐廳食唔會serve你囉…搞乜鬼…做乜我今日返工係咁諗住交叉仔。
無嘅，我照樣serve其他客人，無諗住理個肥仔。
妹：「好變態囉佢真係，佢明知我落緊單嗰陣留意住佢，佢重要起勢咁望住妳隻腳…」
我：「都無辦法嘅，我哋企得喺度就係愛嚟畀啲客望餐飽，食物費用已經包埋。」
妹：「係啫，但佢昅嘢個樣真係好黑人憎。」
我：「其他宅男喺度䚎就唔黑人憎？」
妹：「我諗…其他宅男…可能係因為內向，唔識同人溝通，或者心理問題…迫於無奈先嚟課金睇女，雖然佢哋個樣變變態態咁，但望得嚟都會戰戰兢兢，知道自己做緊衰嘢，但呢條友真係太過張揚，明目張膽，好似有錢大晒就做乜都得咁。」
我：「可能佢真係好肚餓呢…」




妹：「係呀，我梗係知，餓到食埋我哋都重得。」
喺我同沙織講緊嘢嘅時候，肥仔佢蹺住隻腳，一隻手踭向後撐抵住塊凳背，係爭在未有好似交叉仔咁兀凳，再側頭直視住我哋兩個；呢個死人樣，係人見到佢都想走埋去揼佢一鑊，不過首先要用繩將佢綁喺張學生凳上面先，佢個死人頭好適合飾演就嚟俾人撕票嘅富豪二世祖綁架案肉參。
等咗一陣，個蛋包飯整好，沙織向肥仔奉上。
妹：「請問今次想我幫你畫啲乜呀，主人？」
沙織攞住枝茄汁問佢，雖然對話內容仍然係好有禮貌嘅女僕句子，但可以感覺到佢嘅語氣係帶住百般不情願。
肥：「上次妳都畫過，有啲悶，今次我想另外個女僕嚟畫，妳好似係叫Kuromi chan呀可？」佢對住我手指指點名嗌我。
妹：「唔好意思呀，Kuromi係啱啱嚟嘅見習女僕，未係咁熟手，我驚佢畫得唔靚影響到主人進食嘅心情。」沙織盡量保持專業。
肥：「唔緊要，叫佢嚟畫就得。」肥仔斬釘截鐵。
我：「Saori，就等我試下啦。」
呢個時候…我要爆喇！勁想學食神寫個死字喺佢塊蛋皮上面。