我怎可能是女神👸🏻獵人🏹（第一季更新至斷更為止）: 619

咁我覺得，佢早就有仔，又唔算係周圍收兵嘅女神，玩IG其實無乜實際用途，最主要都係為咗保持形象同埋姐妹之間比較；的確係嘅，女仔喺呢啲方面唔可以懶，就算佢花喺指甲腳甲嘅時間都分分鐘同我溫書嘅時間有得揮，而男仔啲時間就用嚟忙於整理D drive。
作為佢最親近嘅人，我到而家都無follow佢IG，因為我無需要靠社交平台嚟接觸佢，但我有時都會䚎下佢出post嘅，通常幾分鐘內就會有十個八個like，好似而家咁，小瘟神個名就彈咗出嚟…
正常不過嘅，好歹都係追求者一號。
我唔知有無其他，但QQ無提，我都唔會關心。
要關心嘅都係佢條仔關心先，幾時輪到我，但諗下諗下如果QQ做自己女朋友都幾提心吊膽…
我：「咦，重想唔想飲godiva朱古力呀？」
然後佢好似望住個傻仔咁望住我。
Q：「食到咁飽重飲乜鬼呀，都唔知你諗乜。」
我：「上次見妳飲得咁開心，以為妳好鍾意嘛。」
頭先餐廳飲品無半價所以無嗌，不過清水就飲咗好多嘅，睇嚟女仔心意都係好飄忽。




Q：「下次先啦，不如我哋落去行taste吖。」
雖然而家唔想飲朱古力，但佢始終都係為食。
就係咁，我哋落到去呢間高級百佳，呢度啲貨多過平時百佳好多，亦都好行好多。
我：「嘩，有特價橙汁呀。」係嚟自美國佛羅里達州嘅鮮橙汁，家庭裝一大盒差唔多兩litre，只係十八蚊，如果出現喺屋企附近間百佳，晨早就會俾啲師奶搶晒。
Q：「哦，係幾抵嘅，呢啲地方特別多清貨，不過得返三日㗎咋喎。」
朱門酒肉臭，路有凍死骨，喺呢啲地方又邊有人搶特價嘢，啲餐廳每日倒幾多嘢都唔知啦。
於是我即刻推咗架車過嚟，放咗一盒落去。
我：「三日夠我飲好多橙汁㗎喇！」
Q：「你唔係諗住當水飲呀？無眼睇你…喂，你重望…唔係重想要多盒呀？我飲少少㗎咋，唔要增肥呀。」確實爽係要付出代價，我都唔敢。
我：「芝士都特價喎，等我攞嚟撈公仔麪變carbonara先。」




Q：「低B，撈公仔麪就叫芝士撈丁啦…」
我：「咁係我煮出嚟嘅，我應該有權幫佢改名掛，再唔係嘅話我撈通心粉囉。」
Q：「嗰個叫mac and cheese囉好唔好…芝士有好多種㗎喎，你識唔識分㗎？」
我：「唔識喎，但特價得兩種，買晒嚟試下囉，如果唔好味嘅話我唔會迫妳食。」
Q：「但問題係我無其他嘢食。」
我：「你咪食返蝦餃囉…呀，火腿同腩肉片都有特價喎，重有燒雞髀添，攞嚟做餸啱啱好。」