我怎可能是女神👸🏻獵人🏹（第一季更新至斷更為止）: 634

我：「呢點…就唔可以講得太清楚喇，始終關於佢嘅私隱，我有責任保護佢嘅，如果妳要怪我唔肯同妳講都無辦法…正如，我唔會同人講妳無剃胳肋底毛咁。」
W：「喂呀，重講！打你㗎！」
我：「剩係打咋，隨便啦，我頂得住。」
W：「厚面皮！賤人，曳到死！」
我：「呵呵，無所謂，反正妳小學嗰陣都係咁諗我㗎啦…好心妳就唔好咁在意嗰兩蓻毛啦，有咪有，無咪無，本身個個都有㗎啦。」
W：「但係…男仔係咪唔鍾意女仔唔剃毛。」
我深呼吸咗一口氣，呢個問題實在係值得深思。
我：「如果單從美學觀感嚟講，例如影泳衣寫真，白白滑滑真係靚啲嘅，但如果單從女性嚟睇呢，都幾得意吖，好似幾乖咁，有傳統嘅感覺。」
W：「以前好多女仔都唔會剃㗎啦，例如湯唯為咗拍戲都要專登留腋毛，重有全裸監督入面嘅黑木香…」
我：「吓，妳竟然會走去睇全裸監督？」




W：「屋企有Netflix嘛，我都係偷偷睇㗎咋…純粹想知係啲乜。」
我：「咁…都正常嘅，我無Netflix想睇都無得睇。」
W：「同親戚夾份買咪得，除返開每人每月先廿幾蚊。」
呢個時候啲食物都送到上嚟，又幾靚仔喎。
海南雞飯其實同切雞飯分別不大，重點係個三色醬，最鍾意啲竭撻撻嘅甜醬油，重有辣椒醋。
韻婷碗叻沙就有兩隻蝦，一隻青口，魚片頭，魷魚圈，都算係咁，搵日同QQ嚟食先，唔算太貴。
W：「你同Queenie真係只係朋友？」
我：「係…我知妳諗乜，佢咁靚女邊有男仔會唔心動喎，如果佢送上門我當然（舌累）飯應啦，但真係無可能喇，佢同男朋友都好穩定下，而且我知自己有幾多斤兩，唔會諗埋啲不切實際嘅嘢。」
W：「但你同佢咁好朋友，就真係無…」
我：「少少身體接觸就有嘅，嗰啲嘢就無啦…我都只係講到咁多，唔可以出賣佢。」




我咁樣唔叫講大話掛，波都未揸過喎。
W：「但係…佢男朋友又會由得佢嘅？」
我：「所以咪話我哋係地下朋友囉，係嗰晚嗰啲鐘數先敢出嚟見下咋，點知俾妳撞到正。」
W：「嗯…女神嘅生活真係多姿多彩…」
韻婷同QQ係兩個世界嘅人，好奇都係非常之正常，只係我就唔知佢點諗喇，羨慕？妒忌？可能啦，定係想我好似對QQ咁對佢呢？