我怎可能是女神👸🏻獵人🏹（第一季更新至斷更為止）: 635

總之佢唔再嬲我就好，我只係想過返啲平靜嘅校園生活，千祈…唔好同我表白呀，求下妳。
W：「咁琴日我咁樣…有無嚇親Queenie？」
我：「少少咁啦，我諗佢都見慣呢啲大場面…不過，搞到佢以為我同緊妳一齊，佢重好擔心我。」
以退為進應該係一個好策略，亦都可以試探一下佢嘅心意，斷估佢唔會順手推舟話不如我哋就一齊掛，話晒都係黃花閨女。
W：「傻嘅咩，我同你…都係隔籬位好朋友咋。」
佢講嗰陣眼神閃閃縮縮，面上都泛起咗一片紅暈，睇嚟QQ都無講錯佢…唉。
W：「不過我呢啲薯仔又無人理，所以唔需要同你做地下朋友，可以返去地面…」
我：「哈，係呀，我都無所謂，從來就唔理其他人點睇同點講嘅。」
W：「不過我啲friend就以為你好曳，重叫我小心啲，唔好同你玩得太埋。」
欸…無論係上面個圈定下面個圈，女仔都係好麻煩嘅一種生物，全部都係八婆嚟。




我：「係咩…咁我到底有幾曳呀？」
W：「咪話你咁細個，就已經同女仔做埋嗰啲嘢，而且個女仔都好細個。」
拜託唔好再傳喇，我真係知錯，唔好搞到我要坐監呀，我重要返工養QQ㗎。
我：「佢哋咁講係事實嚟嘅，我都搵唔到藉口反駁，不過而家收心養性喇，大個啲先再溝女。」
W：「做乜無端端收心養性嘅？」
我：「有啲嘢…試過咪算囉，拍拖…未必好似想像中咁過癮㗎咋，都係日日返學玩塗改液嘅日子最無憂無慮。」
W：「唔準再玩塗改液呀！反面㗎…係嘞，我碗麪好大碗食唔晒，你要唔要試下？」
我：「好呀，妳真係飽咗咪畀我囉。」
正值青春期嘅小男生，食量隨時可以爆炸性超級大，所以啲任食放題就最驚我哋，食多半碗麪濕濕碎啦，唔使錢嘅話食多一碗都重得。
W：「不過有我口水尾㗎喎…」




呢個Wendy實在幾得意，做乜無端端提啲咁嘅嘢，係咪驚我會聽晒佢話？
我：「女仔口水尾我都唔知食咗幾多啦，一早就已經無晒感覺…」橫掂佢都係覺得我曳㗎啦。
然後佢推咗碗麪去我面前，原來摻摻即係米粉同油麪兩溝，都幾過濟㗎喎，不過呢樣嘢我一早已經自創過無數次，我食車仔麪嗰陣最鍾意嗌公仔麪溝烏冬或者溝米線。
我再望一望，入面重有幾條芽菜，加粒魚片頭；再睇清楚，係半粒魚片頭，邊有女仔會咬完一半嚿嘢食再畀男仔食㗎，除咗QQ嗰半隻瀨尿蝦…佢到底係因為飽得滯吖，定專登咬剩半粒畀我呢，睇我食唔食？