我怎可能是女神👸🏻獵人🏹（第一季更新至斷更為止）: 701

我：「得你哋嚟咗咋，Bubble師姐？」
B：「班仔講波我都插唔到口，咁我又唔可以唔嚟，咪索性早啲嚟攞場囉，上一節無人卜，你哋可以入去玩住先。」
無理由插唔到口嘅，妳心口兩個波都咁大，要插乜入去都得啦，係咪？
我：「嘩，第一次喺個咁大嘅球場踢波，重要係草場嚟添。」
健：「使唔使咁興奮呀，仿真草嚟啫。」
我：「嗯，乜你有踢過草場㗎喇？」
健：「小學玩過訓練計劃，所以咪踢過囉。」
我：「嘩，乜原來有啲咁嘅嘢㗎？」
健：「有，康文署搞嘅，重要唔使錢添，但唔好諗住有乜特別，都係抽籤去玩下咁。」
至於我，當然就唔會期望細個嗰陣婆婆搵呢啲嘢畀我玩，有得喺條街跑嚟跑去就已經好滿足。




我：「咁大個場，要踢到個波飛出馬路好似都有啲難度。」應該會有全壘打嘅感覺。
健：「咪搞破壞啦，跑出去執波會跑死人㗎。」
我：「著住對咁嘅鞋踢呢個場，好似會有啲嘥咗我對腳。」貧苦人家嘅小朋友踢波會著乜鞋？不外乎係絕代雙嬌，就係Yasaki同Kamachi，雖然夠晒垃圾，但勝在做乜都得，踢波得，跑步得，跳樓梯得，行後山得，打架都無話唔得，整爛咗買過對都唔會話好肉痛。
至於呢兩個聽落咁日文嘅牌子其實同日本有無關係呢？唔好太多心喇，其實兩個牌子都係同一間香港公司嚟，不過爛作者就偷偷話咗畀我知Yasaki最初嘅發源地的確喺東洋…
健：「吓…乜你最初唔係話唔想踢嘅咩？」
我：「踢波我無所謂，只係我唔鍾意俾人限死幾時幾日要去邊度，我想幾時玩就幾時玩。」
健：「服咗你…一班人唔約時間點踢波喎，呢啲假草場未必啱釘鞋㗎，加埋著新鞋好易唔慣。」
我：「講下啫，你過對面龍，我喺呢邊傳球畀你吖！」
健：「吓…又玩呢啲，你唔好太大力呀，出界你自己執返。」
我：「得啦，跑幾步都懶，不如你唔好踼。」




其實係幾爽嘅，咁大個場可以一腳踢個波飛去對面，爽度就同Bubble姐姐經過可以多手揸下佢波波一樣；就係咁我哋兩個喺度練定點傳球，過咗十幾分鐘之後其他人都開始嚟到，身為師弟嘅我哋當然讓返個場同波畀佢哋。