我怎可能是女神👸🏻獵人🏹（第一季更新至斷更為止）: 702

畫面開始亂作一團，有人喺度射十二碼，有人喺度練直線盤球，有人玩花式足球；班中五可能讀書壓力太大，下下都當個波仇人咁踢。直到啲社長幹事返嚟主持大局，場面先較為冷靜落嚟。
有成四十條友喺個場度，都幾墟冚下。
「玩還玩！都正經啲，踢返場試下啲人腳先！」
幾個form，全部唔同班，好似麻鷹捉雞仔咁。
瘟：「阿爽，第一場我哋對黃社，佢哋得八個人，雖然無話要限死七個人，但總唔可以多人過人哋，不如你下場再落嚟。」
我：「其實如果你夠人我唔踢都得㗎。」
瘟：「乖啦，人多好辦事，唔好畀壓力我啦…」
結果有十個人嘅我哋，我同另外一個中四就要做住觀眾先。
健：「咪畀啲中五玩多啲先，佢哋時日無多。」
我：「唓，DSE咪又係考試，年年都考㗎啦，我成日對住Queenie溫書，覺得佢先係時日無多。」




健：「晒命啦妳…乜佢好勤力嘅咩？」
我：「都係㗎，可能因為佢唔方便出街，所以日日都溫兩三粒鐘書，但佢話以前都係成日補習。」
健：「其實同佢一齊住辛唔辛苦。」
我：「無話辛唔辛苦，我都唔多理佢嘅，不過屋企有個人喺度咪無咁悶，都幾好。」
健：「你間屋以前都成日有人㗎啦。」
我：「咁唔同嘅，嗰啲間唔中上嚟啫，又唔會過夜。」
健：「你返工搵錢畀Queenie，佢有無報答你？」
我：「乜喎…朋友唔係講呢啲㗎嘛，咁佢有難唔通唔幫咩，最緊要佢開心啫。」
健：「佢條仔無畀錢佢使咩？」
我：「點知佢哋喎，唔關我事，唔好講錢喇…」




無論點，QQ都係我好朋友，唔想用錢去衡量我同佢嘅關係。
望住草地上面嘅賽事，其實同街場分別不大，亦都無球證，而觀眾就係旁證；另外個看台都越嚟越多人，原來真係有幾多無聊嘅學生會關心學校嘅活動。
「師兄你好呀。」係兩個低form嘅學生妹。
我：「妳哋…叫我師兄？」
「係呀，你唔係社長嘅同學嚟咩？」
我著住紅社PE衫，咁佢口中嘅社長應該係…
我：「妳講Vincent？佢大我一form㗎。」
「咁你都係我哋師兄，我哋中二咋。」
我：「哦，好囉…兩位師妹好。」
「想問下，你知唔知Vincent佢有無女朋友？」




我：「呀…妳哋…唔係對佢有興趣呀？」
「唔係呀，我哋幫friend問架咋。」
乜呢啲街頭騙案嘅套路，真係會喺現實出現？！