我怎可能是女神👸🏻獵人🏹（第一季更新至斷更為止）: 709

Y：「哈哈，個樣變晒嘅？你都知道大檸樂喱？」
我：「Yv…Yvonne…妳…到底想點？」
Y：「我無想點，我好開心喎，因為我搵到啲好好玩嘅嘢。」
我：「一啲都唔好玩，唔好搵呢啲嘢嚟玩得唔得？」我真心希望佢知就算，唔好八落去。
Y：「唔到你揀，放咗學搭一個站地鐵去齊柏林熱狗等我，如果我去到見唔到人你準備切腹啦。」
佢個樣姣姣地，超級奸詐，帶住邪惡嘅笑容望住我，話畀我聽佢完全無諗住放過我…然後就笑呵呵彈下彈下咁去返佢課室。
點解我會理佢…
QQ…妳實在係太唔小心，明明妳咁叻女；我諗一定係佢琴日行完街蒲咗上一田，咁啱Yvonne又去咗嗰度撞到佢，但就無同佢say hi，結果見到佢喺度一路打電話一路揀雙餸飯，平時嘅QQ一定唔會做呢啲嘢…但係，點解Yvonne會覺得係我？可能真係得我呢啲窮光蛋先會食特價雙餸飯，如果係瘟神嘅話起碼都食刺身拼盤或者燒羊架…再諗都無用，反正Yvonne真係一個叻女嚟，個局亦都set得好好，氹下氹下我就乜都講晒完全唔為意係陷阱嚟；交叉仔，你實在係太大意，明明你係知道要絕對小心呢個女人。
點算…又唔可以話畀QQ知叫佢同我一齊諗辦法。
唔同傻仔健，佢喺班姐妹面前，面子係好緊要…




W：「嘩！你做乜一副炒燶股咁嘅樣？」
我：「係呀…全部國企同科網股都跌到仆直喇…」
W：「做乜呀，唔通偷影女同學裙底要踢出校？」
我：「唔會囉，我唔係咁嘅人，亦唔需要…」
W：「咁你係到底發生乜事？」
我：「我都唔知…剩係知道今次舐晒…」
W：「真係咁嚴重？」
我：「係，重弊過輸truth or dare要同全班女同學表白嗰隻。」
W：「唓，咁係你個人本身唔認真啫。」
我：「是但啦，乜都好，無心情諗呢啲。」




W：「哦，咁不如你試下同我表白吖。」
我：「Wendy，我鍾意妳。」
W：「哎吔，你真係黐線㗎！」
我：「是但啦，我都唔知自己做緊乜，妳由得我…」
W：「可唔可以話畀我知發生乜事呀？」
我：「唔得…sorry。」
W：「咁…希望你最後可以無事啦。」
結果，lunch後嗰三堂我完全係眼光光，飲咗豬肉湯，唔識捹鎯鎯咁嘅死款。
到放咗學，我都無得揀，即刻仆去搭MTR一個站，再上商場去到齊柏林熱狗等嗰條八婆，今勻佢真係如假包換嘅八婆，我實在係命途多舛…
點算好呢…點樣解釋…點解QQ會買飯畀我食？就好似同Wendy講咁話佢只係我嘅朋友？唔得，Yvonne唔似得Wendy咁對QQ無興趣，而且Yvonne叻過Wendy好多，我呃佢嘅話絕對會俾佢踢爆，到時就死多兩錢重。




Y：「咦，你果然夠晒準時喎。」
我：「Yvonne姐姐，妳講到咁我點敢遲到喎。」
Y：「作死你呀，係妹妹！」
睇嚟，佢又唔係太有惡意，都係睇下佢想點先。
我：「係嘅，Yvonne妹妹。」