我怎可能是女神👸🏻獵人🏹（第一季更新至斷更為止）: 710

Y：「喂！你應該未窮到燶掛，請我食熱狗得唔得？」佢擺出一個可愛嘅笑容，但唔知想點。
我：「咁呢度…唔係好貴啫，無問題嘅。」
我望一望價錢牌，單一個熱狗就廿零蚊都有，嗌餐都係加十幾蚊，大致上同M記差唔多。
我：「妳…剩係想咁咋？要食乜？」
Y：「酸菜熱狗餐，薯條轉九件麥樂雞，飲zero。」
於是我就照單同佢買，轉埋九件雞都係五十蚊左右，OK啦，原來幾平，或者以後可以買畀QQ食。
Y：「喂，你唔食㗎？」佢對我白眼。
我：「晏晝已經食咗一大碟飯，妳知㗎。」
Y：「咁你嗌個士林熱狗啦，唔準剩係睇住我食。」
人為刀俎…我當然要聽晒佢話，試下都好嘅。




等咗五分鐘到，我手上面就多咗個紙袋。
Y：「我哋去野餐咯，好唔好？」
我：「妳想點咪點囉，妳話事就得。」
都唔知佢問嚟做乜，我又唔會反抗嘅。
然後我哋離開咗商場，經過天橋去到附近嘅一個公園，沿住公園嘅斜坡上到一個小山丘咁嘅東西，上面有個涼亭可以遮陰，我哋就坐咗喺度。
呢個時候公園唔係好多人，而呢度…唔係平時啲情侶嚟偷情嘅地方嚟咩？算啦，都係唔好諗咁多，有一樣嘢我係可以肯定嘅，就係Yvonne對我無興趣。
Y：「呀，我今日重未食晏，好鬼死肚餓。」
我：「咁妳快啲趁熱食啦，如果唔係啲雞會淋。」
Y：「喂，我未叫你食唔準食住呀！」
都唔知搞乜，明明就係佢迫我陪佢食。




Y：「知唔知我點解今日唔食晏呀？」
我：「妳咪話妳無胃口囉，無乜嘢吖嘛？」
Y：「而家無喇，我由琴晚開始諗到今朝，究竟Queenie佢搞乜鬼，同邊個有啲乜勾當，諗到我頭都爆埋，所以就連飯都唔想食。」
我：「咁真係辛苦晒妳，亦都恭喜妳諗到…」
Y：「哈哈，我覺得我超叻女囉，諗到個咁嘅方法嚟氹你出嚟，而且一估就估得中。」
我：「係嘅，妳實在係冰雪聰明。」
Y：「坦白從寬，點解佢會買飯畀你食？」
我：「佢係我朋友，知我未食飯咪順手幫我買囉。」咁樣講都算係事實掛。
Y：「係呀，你知唔知道，Queenie係一個有錢女，使錢從不手軟，買嘢食嘢無理由會慳嗰一蚊幾毫，正常嘅佢係絕對唔會喺超市個特價counter前面左揀右揀，專心到連我喺佢側邊都睇唔到。」
我：「咁佢幫我買…我無錢吖嘛，咪叫佢買特價。」




Y：「係，我知你無錢，但佢唔係無錢，幫你買咪是但攞一盒囉，然後自己食乜使乜揀，點解攞起兜刺身又放返低，最後買咗腐皮壽司？」
我：「佢都鍾意食…妳唔好問咁多啦，人總有好景同唔好景…」
Y：「咁琴晚你同佢喺邊度食啲食物。」
我：「琴晚呢，呢個…就喺…」