我怎可能是女神👸🏻獵人🏹（第一季更新至斷更為止）: 719

「Miss，多謝妳嘅『肺腑之言』，我哋有溫書㗎。」
鄧：「聽埋我講先啦，由於我想對你哋好啲，所以扚起心肝決定幫你哋安排多一次中文說話練習機會，咁今次會認真啲，唔會由得你哋喺度東有東講，西有西講，我想由頭到尾聽你哋練習。」
「吓，使唔使呀？我哋日日都講中文㗎啦。」
鄧：「睇返你哋上學期啲成績，好明顯係要嘅，就算你哋日日講中文都可以有人唔合格。」
「咁係佢哋唔想講，唔係唔識講囉。」
鄧：「唉，咪就係知道咁樣係唔得，所以想睇你哋練習，今次係會照返大考嘅小組討論形式，四個人一組，首輪發言每人限一分鐘，然後自由討論八分鐘，我會由頭睇到落尾，每一個同學都要參與，而且我會畀分。」
吓，使唔使玩咁大呀，中文oral從來都係hea教㗎啦，以往通常係畀啲題目我哋同隔籬位㞗講下，見Miss行過咪講多兩句囉，否則可能只係謦緊其他嘢，每堂最多抽一組出嚟示範，又或者會有啲好學嘅同學自動請纓，所以好多人根本無實質練習過，包括我。
我：「全世界望住，好大壓力㗎喎。」
鄧：「你上堂成日喺度謦欬又唔見你大壓力。」
我：「點同呢，平時嗰啲係肺腑之言嚟吖嘛，但啲口試題目鬼死咁正經，好尷尬啫。」




鄧：「…，我都知，太多同學望住係會影響表現嘅，尤其係有你呢啲喺度，見到人哋講錯嘢就實喺度笑，所以下個cycle嘅作文堂，我會借埋上一堂嘅地理堂，加埋語言資訊科技室嚟用，到時就一組一組輪流過嚟練習，其他同學就喺度作文。」
「使唔使咁忙呀…」
鄧：「升到高中你哋更加忙呀，同埋為咗增加真實性，今次你哋無得自己分組，要抽籤決定。」
「嘩，唔係呀，會死人㗎！」
鄧：「冷靜啲，本來我想夾埋隔籬班一齊玩嘅，可惜就唔到時間所以作罷。」
我：「咁呢個唔係可惜，係可喜可賀。」
然後Miss就攞咗疊號碼牌出嚟洗牌，為咗唔使啲先生次次寫紙仔嚟抽，我哋整咗疊類似啤牌咁嘅嘢，唔止先生，有時我哋自己私片都會用。
跟住分成八份，有啲四人，有啲五人。
鄧：「第四組有韻婷，阿爽，Queenie…」佢講到呢度都打咗個突，好彩唔係太錯愕，不過其他同學都知我同佢兩個熟，唔會諗埋啲乜嘅。
至於第四人就係坐前面嘅細龜，咁幾好喎…無乜陌生人，而且有細龜喺度就應該可以反襯到我都唔太差，因為佢平時都唔多講嘢；加埋有Queenie喺度，leader一定係佢，我哋唔使膽心，我比較擔心兩個女仔夾住我會喺度諗乜。