我怎可能是女神👸🏻獵人🏹（第一季更新至斷更為止）: 737

「…其次，我認為對於題目入面偶像呢個詞語定義未夠清晰，追星入面所指嘅星係咪一定等於明星？有啲人會用偉人嚟做自己偶像，亦有人會視運動員、藝術家、科學家甚至乎自己嘅親人朋友作為自己嘅偶像，喺呢啲情況下，偶像可以作為一個人嘅目標，學習嘅榜樣，生活嘅依據，甚至乎係精神嘅寄托，咁喺呢啲情況已經同盲目追星係兩碼子嘅事，就算以明星作為偶像，都可以帶住一個欣賞嘅眼光，我相信每一個人都有值得我哋學習嘅地方，例如欣賞佢哋嘅歌藝同埋演技，學習佢哋努力不懈奮鬥嘅精神，只要將著眼點唔再放喺一堆商業產品，而係關注偶像背後嘅故事…」
救命，點解一分鐘可以講咁多粒字？QQ真係好恐怖嘅女仔，平時嘅佢都未至於咁…
而佢講完之後，大家都仍然保持安靜。
Q：「黃同學，頭先你講到，乃木坂46令你覺得快樂，可唔可以講解一下當中嘅原因呢？」
龜：「欸…因為…我覺得，如果人生只有讀書嘅話，其實會好苦悶，有咗偶像之後，我開始會聽佢哋嘅音樂，喺MV或者演唱會度感受到佢哋嘅活力，啲綜藝節目令我歡笑，生活變得充實好多。」
計唔計你平時課金用咗幾多錢，同埋啲靚女令你嘅下半身舒服咗幾多次？
Q：「咁喺崇拜偶像呢件事上面，你有無搵到得著？」有QQ喺度，我哋要講乜好似已經安排好晒…
龜：「因為佢哋…我開始有學下日文，如果唔係…我就完全聽唔明佢哋唱乜，而且都幫助到我玩佢哋隻game…佢哋有首歌叫做黎明來臨前無須逞強，係由我最鍾意嘅成員遠藤桜做中心，歌詞入面…教識咗我每個人都有弱點，最重要係要認同自己，心存希望，咁將來一定會更加美好，每次聽完之後我嘅心態都會變得正面好多，所以我都會播住嚟陪我溫書。」
Well…每當QQ唔喺度陪我溫書，我夠有好多日本姐姐陪我，呢個並唔係你嘅專利嚟。
Q：「嗯，咁喺你嘅例子上面睇到，其實崇拜偶像呢件事都未必係有百害而無一利嘅；咁，韻婷同學，妳講過崇拜偶像最大害處係浪費金錢時間，影響學業，我有一個諗法係呢啲害處係出於當事人嘅性格同態度上面，而唔係出於件事本身，即係話只要有另一件事俾呢類人沉迷，就算唔係追星，一樣嘅害處都會出現，妳嘅睇法係…」




最後喺QQ嘅帶領下，順利咁完成咗我哋嘅練習。
鄧：「非常好，麻煩你哋返課室叫下一組嚟，再將呢疊題目畀最後一組。」
出返走廊，我哋都鬆咗一口氣。
龜：「Queenie…多謝妳，如果唔係妳，我都唔知自己講乜好…好彩有妳。」
Q：「唔會嘅，講下講下就會有嘢講。」