我怎可能是女神👸🏻獵人🏹（第一季更新至斷更為止）: 738

真係未必，聽聞公開試如果你唔主動講嘢，其他組員就會當你死咗一樣，由得你零分，反正總會有啲人好多嘢講唔夠時間用。
龜：「呀，啱啱太緊張攪到好急尿，失陪先！」搞乜鬼，宅男嘅溝通方式實在係令人難以理解。
剩返我哋三個慢慢行返上課室，我讓佢哋行先，因為lady first嘛，而且上樓梯嗰陣我可以欣賞一下佢哋個屁股同埋對腳，其實Wendy唔係差嘅，但一拍埋去成個model咁嘅QQ身邊…
W：「Queenie呀…」
Q：「嗯，做乜呀，韻婷？」
W：「上次…無嚇親妳吖嘛…」
Q：「哦，好少事啫，我都差啲唔記得。」
W：「係我衝動咗，完全唔關妳事嘅，打攪到妳想講返聲sorry。」
Q：「傻啦，唔使放喺心，呢條友喺出面得罪咁多女仔，就算無端端有女仔衝埋嚟追斬佢我都覺得唔出奇，唔好傷到我就得。」
我：「唔好咁誇張好喎…我邊有咁過份…」




W：「乜佢真係有咁曳㗎？」
Q：「我諗…呢層妳直接問返佢好啲，佢做過啲乜嘢壞事要佢本人先知。」
W：「都係，佢細細個已經好曳。」
我：「乜喎，玩下塗改液啫，無咁十惡不赦呀？」
W：「不過坐喺佢隔籬都幾開心，佢係一個幾得意嘅男仔，成日講嘢好好笑。」
Q：「都算係嘅，不過妳千祈唔好俾佢氹咗落踏呀，條友最叻就係呃蝦條，如果蝕底畀佢就唔係幾好，要保持返一定嘅距離。」
喺兩個女仔中間，我根本無插口嘅餘地。
日子一日一日咁過去，大限就嚟殺到埋身…
可幸嘅有兩件事，Wendy雖然有搵我同佢一齊溫書，但一直都只係專心學習，間唔中吹下無謂水，無謦啲乜嘢敏感話題，亦無對我做成任何壓力，我諗佢只係當我好同學嘅啫，咁樣一齊坐都幾舒服；第二，嗰日之後Yvonne就完全變返正常咁，同我講多一句都無，亦無偷偷地搵我，唔講嘅話我差唔多已經唔記得咗自己俾佢要脅緊，可能佢溫書已經忙到一頭煙，又或者我已經俾佢玩厭咗掛…係嘅話就可喜可賀。
健：『喂，返緊工？』




我：『無，請咗假，同某人溫書中。』
健：『有無興趣落樓下做下運動？』
我：『吓，咁夜，十點都嚟緊喇喎，你會㗎咩？』
健：『溫書溫到個腦塞晒，想落去郁下，通一通個腦。』
我：『係？定係J返兩次通下前列腺比較實際？』
健：『你估我係你可以日日對住女神然後J？』
我：『Sorry，我對住佢都不知幾斯文。』