我怎可能是女神👸🏻獵人🏹（第一季更新至斷更為止）: 762

粉紅色嘅錶帶，鏡面嘅不銹鋼錶身，3D弧形玻璃錶面，五光十色嘅動畫，由粉紅，粉紫，粉藍三種色調互相漸變替換，無限擴散螺旋嘅花紋圖案，外圈鏤空嘅公司LOGO式樣；呢種紙醉金迷彷彿就係拉斯維加斯入面蘇聯輪盤嘅縮影咁，而個官網亦都好大大方方咁打咗個銀碼出嚟，盛惠二萬六千幾港子…
我：「係好靚…咁…佢又有乜用？」
Q：「無乜㗎咋，靚囉，錶喺而家呢個年代主要都係用嚟裝飾㗎啦。」
或者，二萬六千幾並唔算係一個天文數字，但我諗呢世我都無機會買啲咁嘅嘢；到底，我應唔應該送生日禮物畀佢好？定係好型咁惜佢一啖話送個香吻畀佢…睇怕一定會俾佢話無聊兼俾佢打。
做女仔真係好，話送自己畀人就得…
星期四，衰豬慶祝考完試直播，我可以難得地全程喺屋企睇住佢。無錯，性感係好性感，甚至乎我可以多角度咁望住佢，但…我為乜要睇一個戴住面具嘅靚女喺度彈琴？啲宅男真係好無聊，而且重要課金畀佢，完全諗唔明係乜嘢心態。
唔係諗住課得多就有得食呀？天真！
但無論點都好，佢有收入係一件好事。
星期五，學校已經開啟咗試後活動模式，變得free咗好多，朝早就係對卷…欸，唔講太多喇，第一日剩係派咗中英文，兩科都唔係我嘅強項，叫做keep得住個成績，中文就點都好少少嘅；語文能手QQ當然唔使擔心，而Wendy呢，同我差唔多，不過佢就英文好少少。
W：「係呢，你晏晝重返唔返嚟學校，定係直接去球場㗎喇？」




我：「嗯…直接去啦，我返嚟都無嘢做，又唔使點名嘅，我抖足精神去踢波好過。」
W：「班會好似話想謦下搞唔搞多最後一次活動，重有少少錢剩，可能去聚餐或者燒野食。」
我：「是但啦，我無乜所謂，要去咪去囉，唔好太貴就得。」
W：「咁…你而家係咪返…」
健：「喂，你條友仔放下心頭大石啦，兩科語文都合格有突，剩返嘅應該唔會有乜問題啦。」
我：「可以咁講嘅，希望…你哋都考得OK嘛？」
健：「算係咁，重高你兩三分嘅，佢都合格。」
康：「唉，係合格咋，唔可以叫做好，只係唔使俾人打。」
健：「唔使灰，最緊要升到班啫，出年再努力。」
我：「咁睇嚟補習都有少少用。」




康：「有啲嘅，但咁樣讀書好辛苦，而且都唔可以話有乜大進步。」
健：「唔好講悔氣說話啦，所有嘢已經塵埃落定，一齊去食lunch啦，都唔知重有幾多餐㗎咋！」
佢講得無錯，我哋好大機會唔再同班，到時就未必會一齊食飯，如果無乜共同活動嘅話隨時會成陌路人；但對我嚟講，學校無咗邊個其實都已經無乜所謂，本身我就唔係一個好重情誼嘅人，以前日日躝街遇到邊個就同邊個玩㗎啦，有啲朋友仔可能名都嗌唔出，但以前都曾經試過一齊由朝玩到晚…最重要，我屋企已經有我最重要嘅同學。