我怎可能是女神👸🏻獵人🏹（第一季更新至斷更為止）: 766

我：「好…踢完初賽，我要去搵返啲隊員先，好似話有briefing，你哋唔使等我哋喇。」
重有少少時間先要交場，我哋紅綠社繼續各霸住半邊場喺度研究戰術，順便玩下粒波射下龍門；輸咗嗰兩個社就喺場邊hea下咁，但佢哋都唔可以氣餒，因為重有所謂嘅季軍賽要踢，無人想做第尾，縱使第尾嘅話唔使罰更加多。
至於嗰兩個社長呢，我就偷聽到佢哋喺度鬥嘴，話乜無咁大個頭又戴咁大頂帽，益晒瘟神云云…
「好啦，係咁啦，下場我識點做㗎喇，最緊要留返一球俾我入就得，我已經叫晒全班女仔嚟睇。」
「乜畀你呀，家陣我唔使入呀，你physics班全部女仔加埋都唔夠十個，好似我呢邊緊要啲喎。」
瘟：「好好好…你哋都踢得非常好，下場要繼續拜託你哋，有波一齊入，唔使爭嘅，有女就…各自食啦，好唔好？」
「梗係啦，我哋商科班啲女優質咁多，點可以讓畀佢！」
「食屎啦你，你哋成班都係功利嘅死港女嚟，你小心俾人食返就真，好好受啦。」
「又唔係過人世，執著呢啲嚟做乜啫？真心…你哽得落你嗰班啲素顏豬豬先好。」
「有無聽過呢啲女仔先真誠有禮好服務？有本事叫你哋班啲女落晒妝再比一比！」




「熄燈罷就啦！同你講都嘥氣，走先！」
就係咁…兩個校隊前鋒各自走人先。
其實我哋係抽到枝好籤嘅，兩個校隊主力喺紅社，瘟神亦都踢得好過另外兩個社長，加加埋埋我哋成隊都比較可以投入喺球賽入面。
Q：「你哋無嘢搞㗎啦，咁…我同班姐妹去行街先。」QQ煞有介事咁嚟道別，似乎係想表達禮儀；當然，佢手上係戴住人哋送畀佢嘅手錶。
瘟：「嗯，都差唔多交場，bye bye喇…」
「贏波就得啦，無我哋嘅事，都走先喇！」
瘟神無奈咁對住文書財政兩位靚女揮揮手，差在未嘆埋啖氣出嚟，而我哋各人都開始四散。
本來我想搵埋阿健一齊走人，但我左望右望都唔見人，連bubble同其他綠社嘅都少咗好多，唔通…佢哋社長要慶祝贏波請大家眼睛食雪糕？
正當我想走人嘅時候，有人拍拍我膊頭。
瘟：「點呀，隻腳無事吖嘛？」




我：「無呀，行得走得，已經唔痛。」
瘟：「不如…我哋謦下欬先走？」
我：「吓…唔會係我踢得太差吖嘛？」
只係俾人入咗一球，唔係咁都要怪罪我呀？
瘟：「唔會，嚟吖，請你飲罐嘢，寶礦力啱唔啱？」