就係咁,我哋兩個上咗看台睇波,交完場之後太陽開始落山,有班類似大學生嘅物體入咗嚟踢波。搞乜鬼社長會無端端搵我謦欬,按道理佢就應該唔係想多謝我;唔通…佢係基嘅?!追QQ只係煙幕?我唔掂㗎喎…我剩係對女仔有興趣,雖然…我後面已經唔係處男。
殊!大家唔好問咁多,自行想像啦。
如果唔係,篇文跌落甜文區個爛作者又發癲…
學QQ話齋,任何嘢都有個價嘅,不過生果錶就太cheap喇,起碼都要LV…都係唔好,直接勞力士或者積家錶啦;本人就收得唔係好貴嘅啫,我硬唔到唔緊要,最緊要你硬到啫,加埋你都幾靚仔。
瘟:「成日都覺得…啲中五好似唔想理我咁。」
我:「咁…無辦法㗎喎,文書同財政姐姐唔係明花有主㗎喇咩?」你個花心蘿蔔皮吖,明明喺度追緊QQ,原來重心儀師姐…不過右女神一樣係O嚟。
我就梗係扮唔知佢追QQ啦,都唔知佢想點。
瘟:「呀…哈哈,我唔係話佢兩個呀,我係話啲中五隊員啫。」原來我錯怪咗呂洞賓。
我:「原來你講佢哋…都正常,本身佢哋高你一form,而且又係足球校隊,想跟返自己踢法就梗㗎啦…我覺得啦,佢哋想入波,要出風頭,咪由佢哋囉,我諗你唔指揮佢哋都識自己踢嘅,如果唔係輸咗咪盞佢哋自己柒返。」
瘟:「你都睇得幾通透喎,但唔得㗎,輸贏係其次,我身為社長點都要講下嘢㗎,就算只係做下樣,如果唔係啲人就會話我hea,free ride人哋,form four仔搶乜鬼社長嚟做。」


我:「欸…我就唔知你為乜要做社長,不過,要做嘅嘢你都做咗啦,暑假都嚟唔會有人怪你嘅。」
瘟:「如果有得揀多次,我可能會想留返下年先做,應該會輕鬆好多,唔知…下年會唔會有人想做呢?有嘅話我讓畀佢都唔錯。」
我:「你捨得咩?有咁多幹事女女圍住你轉。」
瘟:「得個睇字,無得食。」
我:「今年食唔到啫,留返出年囉。」
雖然無論點你都唔會食到右女神,因為我已經有晒內幕消息,其他女就隨便你啦。
瘟:「哈…其實我唔應該咁講,你條友仔實出賣我,我唔係想食,我係真心嘅。」
我:「哦,好嘅…雖然唔知你講乜。」
瘟:「咪扮唔知,就算佢無同你講,喺其他人口中都會聽到啦。」佢溝埋苦笑同暗笑望住我。
我:「無啲咁嘅事,我係小薯仔,不問世事,與世無爭,坐懷不亂,虛懷若谷,三九廿七…」


瘟:「其實,我已經放棄咗喇。」
我:「咪住,我唔知你講邊個,不過你鍾意咪放棄囉。」同我講做乜喎,我唔識教你溝佢。
瘟:「仆街仔!我係講你個好朋友Queenie呀!」
我:「呀嘩?!你竟然想追女神?!」我一面驚恐。
瘟:「重扮嘢…真係想一腳踢死你。」
已有 0 人追稿