我怎可能是女神👸🏻獵人🏹（第一季更新至斷更為止）: 775

Q：「因為…你喺球場上面夠晒無所事事同漫無目的，但又可以感受到你嘅活躍同埋熱情，其他嘅人，有啲為咗出風頭想睇啲女為佢哋爭風呷醋，有人背負住個社嘅名聲點都要出盡全力，有啲本身校隊嘅喺度玩內鬥…不過你就好似剩係睇到個波咁，每次飛到過嚟就會乜都唔諗衝過去搶。」
啱嘅，一開始心態我就係去湊人數乜都無所謂，同邊個踢都唔知；瘟神呢啲就硬住頭皮都要指揮啲中五嘅師兄，而Bubble身為女仔都要喺場邊睇住自己啲隊員，都咪話唔大壓力。
我：「咁我…係唔使吸引女仔視線嘅，妳日日都喺屋企望住我㗎啦。」
Q：「韻婷好期待你表現㗎，下場繼續努力啦。」
我：「吓，做乜無端端講佢喎…」
Q：「人哋唔係專程嚟睇你踢波嘅咩，我就唔信係因為佢本身鍾意足球嘞。」
我：「咁…純粹支持下同學同朋友啫。」
Q：「信我啦，如果你入到波佢會好開心㗎。」
支持心上人…係正常嘅，等於我見到QQ考到好成績，或者型到爆咁帶領啦啦隊攞冠軍都會開心到爆；而我，只需要QQ妳一個嘅支持就夠，Wendy嘅存在始終都係一個問題嚟，雖然只係剩返一個禮拜。
我：「呀！死火！我夠鐘落去開工！」




Q：「快啲去啦，唔好轆落樓梯呀。」
我唔想再同QQ糾纏喺呢個問題上面，唔通我話佢知我好受歡迎要示威，叫佢考慮下我咩？而我更加無可能同佢講我對佢一心一意，其他女仔我都唔會理…
之後，應該就唔會出事，唔同咗班睇怕就無乜機會…但又好難講，我同細蚊唔同學校都可以啦…
我：『星期日落唔落街場踢下波呀？』
健：『可以呀，專登練波準備比賽？』
我：『比賽事小，阻止你入波事大。』
健：『做乜啫，驚喺女神面前失威呀？』
我：『唓，佢都唔係嚟睇波嘅，根本就有其他目的，例如social。』
健：『Kuromi…又真係好難講嘅，通常女仔對踢波都無乜興趣，有邊個會似得我哋社長咁熱血。』
我：『佢本身就係運動人嚟，無得好講嘅。』




健：『你唔係返緊工㗎咩？做乜可以send message畀我㗎。』
我：『已經做到熟晒手，而家係我等啲客走，而唔係啲枱等我執。』
健：『…，唔阻你，星期日見啦。』
返工嘅日常…都唔錯嘅，起碼可以有錢使，而QQ嘅直播，都係返工嘅一種；我發現到當一樣嘢係同返工掛咗鈎之後個人就會無乜感覺，例如有啲客食到天一半地一半咁，開始嗰陣會好憎，覺得佢哋整到啲地方污糟晒，後來就會睇化咗；所以而家睇到QQ打扮到好性感，花枝招展喺度返工，我都無乜feel，反而平時嘅佢吸引好多。
不過，佢彈琴係幾好聽嘅。